រឿងរ៉ាវដ៏សោកសៅ នៅពីក្រោយប្រ៊េនសម្លៀកបំពាក់កូនខ្មែរ ដែលកំពុងផ្ទុះការចាប់អារម្មណ៍លើឆាកអន្តរជាតិ​

មួយរយៈក្រោយនេះ ម៉ាក Almée ដែលគេស្គាល់ថា ជាប្រ៊េនសម្លៀកបំពាក់កូនខ្មែរ បែប Couture ឬ ប្រណីតលំដាប់ខ្ពស់ បានកំពុងផ្ទុះការចាប់អារម្មណ៍ខ្លាំងនៅលើឆាកអន្តរជាតិ។ នេះក៏ព្រោះតែស្ថាបនិកម៉ាកយីហោ គឺ កញ្ញា Taing Sokhang បាននាំយកឈុតខូឡិកហ្សិនទៅបង្ហាញក្នុងកម្មវិធីធំៗនៅឯក្រៅប្រទេស ដូចជាកម្មវិធី New York Fashion Week 2025 នៅឯសហរដ្ឋអាមេរិក និង កម្មវិធី Sanya Bridal Fashion Week 2025 នៅឯប្រទេសចិន។

សម្លៀកបំពាក់របស់ Almée ជាខូឡិកហ្សិនមានលក្ខណៈអេឡេហ្គង់ប្រណីត ដោយច្របាច់បញ្ចូលស្ទីលមិនចេះហួសសម័យ ជាមួយទំនើបភាព។ ម៉ាកនេះបានបើកទំព័រខូឡិកហ្សិនដំបូង ឈ្មោះថា Spirit of the Forgotten ហើយក៏ជាលើកទីមួយ ដែលបានបង្ហាញវត្តមាននៅលើឆាក New York Fashion Week ផងដែរ។

Spirit of the Forgotten ជាខូឡិកហ្សិននិទាឃរដូវ និង រដូវក្តៅឆ្នាំ ២០២៦ ឬ Almée Couture Spring/Summer 2026 ។ វាបាននាំនូវរឿងរ៉ាវ ដែលស្ទើរតែបាត់បង់ទៅតាមពេលវេលាឱ្យត្រលប់មកវិញ ដោយបានដកស្រង់ពីប្រាសាទអង្គរដ៏ពិសិដ្ឋ លំហូរទន្លេកម្ពុជា និង សម្រស់នៃផ្កាព្រៃ។ ការរចនាម៉ូដលើឈុតនីមួយៗ ត្រូវបានធ្វើឡើងដោយដៃ អមនឹងការប៉ាក់ឌិនយ៉ាងឥតខ្ចោះ ផ្កាផុសត្រដែតបែប 3D បូករួមនឹងការដេរយ៉ាងយកចិត្តទុកដាក់ ដោយលាយបញ្ចូលនូវលំនាំបុរាណជាមួយរាងបែបសហសម័យ។

បើតាមម្ចាស់ប្រ៊េន Almée រូបនេះ បង្ហោះវីដេអូនៅលើគណនី TikTok ខូឡិកហ្សិន Spirit of the Forgotten ក៏បានភ្ជាប់នឹងអត្ថន័យជ្រាលជ្រៅផ្ទាល់ខ្លួនរបស់នាងផងដែរ។ ជាក់ស្តែង នៅក្នុងដំណើរយកខូឡិកហ្សិនទៅបង្ហាញនៅអាមេរិក ក្នុងថ្ងៃទី ២ ពេលកំពុងស្ថិតនៅទីនោះ Taing Sokhang ​​នាងទទួលបានដំណឹងដ៏សោកសៅ ដែលឪពុករបស់នាងបានទទួលអនិច្ចកម្ម។ ភ្លាមនោះ នាងសឹងតែបោះបង់ទៅហើយ តែដោយបានបងស្រីជាអ្នកលើកទឹកចិត្ត នាងក៏សម្រេចបន្តធ្វើរហូតបានជោគជ័យ។ នាងអាចធ្វើវាបាន! នេះជាអ្វីដែលឪពុករបស់នាងចង់ឃើញបំផុត។ ដូច្នេះហើយខូឡិកហ្សិននេះ ក៏ជាការគោរព និង ឧទ្ទិសទៅដល់ឪពុកនាងផងដែរ។

បច្បុបន្ន ម៉ាក Almée ទទួលបានការចាប់អារម្មណ៍ខ្លាំង ទាំងក្នុង និង ក្រៅប្រទេស។ សម្លៀកបំពាក់ម៉ាកនេះ ពេញនិយមពាក់ពីតារាល្បីៗ បុគ្គលលំដាប់ខ្ពស់ កំពូល Influencer និង អ្នកនិយមហ្វេហ្សិនបែប Haute Couture៕