ភាពស្លេកស្លាំងដោយសារកង្វះជាតិដែកលើកុមារ នៅតែជាកង្វល់សុខភាពដ៏ធំមួយនៅក្នុងប្រទេសកម្ពុជា។ យោងតាមរបាយការណ៍អង្កេតប្រជាសាស្រ្ត និង សុខភាពកម្ពុជាឆ្នាំ ២០១៤ ភាពស្លេកស្លាំងដោយសារកង្វះជាតិដែកធ្វើឱ្យកុមារអាយុក្រោម ៥ ឆ្នាំ ប្រឈមនូវផលប៉ះពាល់មួយចំនួនដូចជា ៖ ឧស្សាហ៍ឈឺ ខ្សោយបញ្ញា ការអភិវឌ្ឍខួរក្បាលយឺតយ៉ាវ ។ល។ កង្វះអាហារូបត្ថម្ភ ក៏នៅតែជាដើមហេតុមួយផ្សេងទៀត ដែលអាចធ្វើឲ្យអាត្រាកុមារដែលប្រឈមជំងឺទឹកនោមផ្អែម មានការកើនឡើងគួរឲ្យបារម្ភ [1]។
ក្រសួងអប់រំ យុវជន និង កីឡា សហការជាមួយ ក្រុមហ៊ុន Danone កម្ពុជា បានរៀបចំយុទ្ធនាការលើកកម្ពស់សុវត្ថិភាពចំណីអាហារតាមសាលារៀន ក្រោមប្រធានបទ «សុខភាពកុមារ និង ជាតិដែក» ដែលបានប្រព្រឹត្តទៅនៅវិទ្យាស្ថានជាតិអប់រំ នៅថ្ងៃទី ០៧ ខែឧសភា ឆ្នាំ ២០២៥ ក្រោមអធិបតីភាពរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និង កីឡា និង លោក Danish Rahman នាយកគ្រប់គ្រងទូទៅ ក្រុមហ៊ុន Danone ប្រចាំតំបន់អាស៊ីអាគ្នេយ៍ ក្នុងគោលបំណងរួមគ្នាកាត់បន្ថយភាពស្លេកស្លាំងដោយសារកង្វះជាតិដែកលើកុមារ និង ផ្សព្វផ្សាយអំពីការអនុវត្តសុវត្ថិភាពចំណីអាហារតាមសាលារៀននៅប្រទេសកម្ពុជា។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី មានប្រសាសន៍ថា ៖ «កុមារជាធនធានមនុស្សដែលមិនអាចខ្វះបានសម្រាប់អភិវឌ្ឍប្រទេសជាតិនាពេលអនាគត។ ចំណីអាហារល្អនាំមកនូវសុខភាពល្អ ដើម្បីសម្រេចបានលទ្ធផលសិក្សាល្អរបស់កុមារ។ ភាពជាដៃគូជាមួយ ក្រុមហ៊ុន Danone នឹងអាចធានាបាននូវសុវតិ្ថភាពចំណីអាហារ តាមរយៈការបង្កើតទម្លាប់បរិភោគអាហារដែលមានតុល្យភាព អាហារូបត្ថម្ភសមស្រប និង ចៀសវាងភេសជ្ជៈផ្អែម ដើម្បីឱ្យពួកគេលូតលាស់ធំធាត់ និង ក្លាយជាទំពាំងស្នងឬស្សីរបស់សង្គមជាតិ»។
លោក Danish Rahman បានលើកឡើងថា ៖ «បេសកកម្មរបស់យើង គឺផ្តល់សុខភាពតាមរយៈអាហារទៅកាន់មនុស្សកាន់តែច្រើនតាមដែលអាចធ្វើទៅបាន។ ដូចនេះហើយ ក្រុមហ៊ុន Danone កម្ពុជា គាំទ្រ និង បន្តកិច្ចសហការជាមួយ ក្រសួងអប់រំ យុវជន និង កីឡា ក្នុងការចូលរួមកាត់បន្ថយភាពស្លេកស្លាំងដោយសារកង្វះជាតិដែក ដើម្បីធានាបានថា កុមារទទួលបានអ្វីដែលល្អបំផុត តាមរយៈការបង្កើនចំណេះដឹង ការត្រួតពិនិត្យភាពស្លេកស្លាំង និង ការផ្តល់អាហារូបត្ថម្ភមានជាតិដែក និង វីតាមីនស៊ី ជាដំណោះស្រាយសុខភាព ដែលអាចជួយឲ្យកុមារលូតលាស់បានយ៉ាងពេញលេញ»។
យុទ្ធនាការសុវត្ថិភាពចំណីអាហារតាមសាលារៀន នឹងផ្តល់ការអប់រំដល់គណៈកម្មការគ្រប់គ្រងសាលារៀន លោកគ្រូ អ្នកគ្រូ មាតាបិតា សិស្សនុសិស្ស និង សាធារណជនអំពី៖
១. ការបង្កើតទម្លាប់បរិភោគអាហារប្រចាំថ្ងៃ ៣ ក្រុម អាហារថាមពល អាហារសាងសង់ និង អាហារការពារ (តិចខ្លាញ់ តិចអំបិល តិចស្ករ)
២. អាហារូបត្ថម្ភមានជាតិដែក និង វីតាមីនស៊ី
៣. ការចៀសវៀងភេសជ្ជៈផ្អែម
យុទ្ធនាការអប់រំនេះនឹងត្រូវបានផ្សព្វផ្សាយ តាមរយៈសម្ភារៈអប់រំនៅតាមសាលារៀន វីដេអូអប់រំ សាធារណៈ និង ការពង្រីកវិសាលភាពផ្សព្វផ្សាយ តាមរយៈអ្នកបង្កើតមាតិកាផ្សេងៗ។
សូមចូលរួមយុទ្ធនាការសុវត្ថិភាពចំណីអាហារតាមសាលារៀនទាំងអស់គ្នា!
[1] Dilek.S et al. Determination of malnutrition status of children with diabetes during diagnosis. Human Nutrition & Metabolism. https://doi.org/10.1016/j.hnm.2021.200123
