មហាជននិយមតាមដានជីវិតការងារសិល្បៈរបស់តារាស្រី ព្រះកាយ ច័ន្ទ ច្បាស់ជាបានជ្រាបមកហើយ ពីទេពកោសល្យដ៏សម្បូរបែបរបស់នាង ដែលមានជំនាញជាច្រើន។
ក្នុងនោះដែរ កញ្ញា ព្រះកាយ ច័ន្ទ មិនត្រឹមតែជាតារាចម្រៀងយុវវ័យ ជាពិធីការិនី តារាសម្តែងប៉ុណ្ណោះទេ តែនាងក៏ជានាដការបាំបុរាណ និង ជាគ្រូបង្ហាត់របាំបុរាណ សម័យដល់ក្មេងៗជំនាន់ក្រោយថែមទៀតផង។
ជាការពិតណាស់ កញ្ញា ព្រះកាយ ច័ន្ទ បានបោះជំហានឈានចូលវិស័យសិល្បៈតាំងពីនាងនៅកុមារមកម្ល៉េះ ដែលដុះចេញពីការហ្វឹកហាត់របាំបុរាណនៅសាលាវិចិត្រសិល្បៈ ដោយមានការជ្រោមជ្រែងពីលោកឪពុកតាំងពីតូច រហូតដល់លោកទទួលមរណភាពនៅអំឡុងឆ្នាំ ២០២១ កន្លងទៅ។
ដោយឡែក ថ្មីៗនេះ កញ្ញា ព្រះកាយ ច័ន្ទ បានបង្ហោះរូបភាពពីកុមារភាពរបស់នាងចំនួន ៤ សន្លឹក អំឡុងពេលតុបតែងខ្លួនរបាំបុរាណ ដែលធ្វើឱ្យអ្នកគាំទ្រលើកឡើងថា កញ្ញា ព្រះកាយ ច័ន្ទ ស្រឡាញ់ និង តស៊ូជាមួយនឹងសិល្បៈតាំងពីតូច មកដល់បច្ចុប្បន្ន។ លើសពីនោះ គ្រប់គ្នាបានលើកឡើងថា ការតស៊ូរបស់នាងពិតជាមិនខុសបំណងនោះទេ ដោយសព្វថ្ងៃ នាងទទួលបានភាពជោគជ័យលើផ្លូវមួយនេះ៕
