នៅថ្ងៃទី ០៥ ខែមេសា ឆ្នាំ ២០២៥ លោកគ្រូចិនសែ ម៉ុង ដែលកំពុងមានប្រជាប្រិយភាពតាមរយៈការចែករំលែកចំណេះដឹងហុងស៊ុយ បានចែករំលែកនូវរឿងរ៉ាវឆ្នាំទាំង ១២ ដែលបានកើតឡើង និង របៀបកែកុនក្នុងខែ «មេសា» នេះ ដែលតាមក្បួនហុងស៊ុយគិតចាប់ពីថ្ងៃទី ០៥ ខែមេសា ដល់ថ្ងៃទី ០៥ ខែឧសភា ឆ្នាំ ២០២៥។
ជាក់ស្ដែង រឿងរ៉ាវឆ្នាំទាំង ១២ ដែលកើតឡើង ក្នុងខែមេសា ឆ្នាំ ២០២៥ មានដូចតទៅ ៖
១. ឆ្នាំជូត
ក្នុងខែនេះ ជាខែដែលមិនឆុងនោះទេ នេះបង្ហាញថារាសីរបស់អ្នកនៅកម្រិតល្អនៅឡើយទេ តែខែនេះអាចអ្នកប្រឈមជាមួយការខ្វះវីតាមីន ឬជាតិទឹកខ្លាំងក្នុងខ្លួនរបស់អ្នកខុសធម្មតា ដូចនេះ ពិសារទឹកឱ្យបានច្រើន។ ការងាររកស៊ីផ្សេងៗ ខែនេះហត់ខ្លាំង គេប្រើច្រើនបន្តិចហើយ ហើយអាចមានគ្រោះថ្នាក់ដោយសារទឹកថែមទៀតផង ប្រយ័ត្នប៉ុណ្ណឹងសិនបានហើយ។
ដំណោះស្រាយ ៖ បើអាចសូមពាក់អាវពីធាតុមាស ឬ ពណ៌ស ឱ្យច្រើនក្នុងខែនេះ។
២. ឆ្នាំឆ្លូវ
ខែមេសានេះ ឆ្នាំឆ្លូវមិនសូវល្អនោះទេ គឺឆុងខាតបង់ ខែនេះអ្នកត្រូវប្រយ័ត្នចំពោះការសម្រេចចិត្តនានាដែលជាប់ពាក់ព័ន្ធជាមួយរឿងលុយកាក់ គឺត្រូវប្រយ័ត្នអាចគិតខុសនាំឱ្យខាតបង់កម្រិតធ្ងន់ធ្ងរ។ ក្នុងខែនេះ អ្នកអាចមានវិបត្តិសេដ្ឋកិច្ចធ្ងន់ធ្ងរដោយសារការចាញ់បោក ព្រោះអ្នកទុកចិត្តគេពេក យល់ល្អពុំគួរបញ្ចេញលុយច្រើនពេកនោះទេ ក្នុងខែនេះ។ គ្រោះថ្នាក់ប្រយ័ត្នបន្តិច ការពុលអាហារ ការគាំងបេះដូង។
ដំណោះស្រាយ ៖ សូមអ្នកព្យាយាមងូតទឹកក្ដៅឧណ្ហៗឱ្យបានច្រើន ពិសារម្ហូបក្ដៅៗឱ្យបានច្រើនគឺអាចកាត់បន្ថយបានច្រើនគួរសមក្នុងបញ្ហាខាងលើនេះ។។
៣. ឆ្នាំខាល
ក្នុងខែនេះ រាសីរបស់អ្នកក៏ស្ថិតក្នុងរូបភាពមិនសូវល្អនោះទេ អាចងាយមានជម្លោះកើតឡើងក្នុងគ្រួសារ រវាងប្ដីប្រពន្ធ បងប្អូនបង្កើតជាដើម ការជម្លោះនេះគឺជាប្រភេទជម្លោះកម្រិតធំដុំផងដែរ។ ក្នុងខែនេះការរកស៊ី គឺមិនសូវជាមានបញ្ហាអ្វីនោះទេ តែសម្រាប់អ្នកធ្វើការវិញ ក្នុងខែអាចមានការទាស់សំដីជាមួយថ្នាក់ដឹកនាំ ឬមិត្តរួមការងារ នាំឱ្យពិបាកមើលមុខគ្នាណាស់ សម្រាប់ថ្ងៃអនាគត។
ដំណោះស្រាយ ៖ គួរឧស្សាហ៍ទៅលេងទឹកសមុទ្រ ឬ ត្រាំទឹកត្រជាក់ ហូបទឹកឱ្យច្រើន ងូតទឹកឱ្យបានយូរបន្តិច អាចកែសម្រួលរាសីឱ្យល្អឡើងវិញបានច្រើនគួរសម។
៤. ឆ្នាំថោះ
រាសីខែនេះ ជាខែដែលនាំហេងមកឱ្យអ្នក តែហេងដែលចូលមកនេះ គឺជាហេងដែលកើតចេញពីការកំហុសរបស់អ្នក មានន័យថាអ្នកសាងកំហុសមួយសិន ហើយដោះស្រាយកំហុសនោះចប់ ទើបមានលាភចេញពីកំហុសនោះមកវិញ។ មានតែប៉ុណ្នឹង រឿងផ្សេងៗ ប្រឹងធ្វើទៅ គឺបានសម្រេចហើយ។
ដំណោះស្រាយ ៖ ក្នុងខែនេះ ហូបអាហារបួសឱ្យយ៉ាងតិច ៣ ដងក្នុងខែនេះ គ្រប់យ៉ាងគឺល្អប្រសើរឡើងវិញបានច្រើនកម្រិតផងដែរ។
៥. ឆ្នាំរោង
ខែនេះ គឺជាខែឆុង បញ្ហាអំនួតហួសប្រមាណ នាំទុក្ខដាក់ខ្លួន ងាយចាញ់បោកសំដីផ្អែមរបស់អ្នកដទៃ អ្នកអាចមានបញ្ហាដាច់សាច់ដុំ ឬបញ្ហាពាក់ព័ន្ធជាមួយសាច់ដុំ ប្រយ័ត្នគ្រោះថ្នាក់របើកក្រចកដៃ ក្រចកជើង ហើយរឿងលុយកាក់មិនសូវល្អទេ កុំងាយដាក់ទុនលឿននរហ័សៗពេកអី ស្នេហាមិនល្អទេ អាចបែកបាក់ដោយសារគេក្បត់។
ដំណោះស្រាយ ៖ សូមព្យាយាមហូបអាហារក្ដៅៗឱ្យបានញឹកញាប់ ហើយអាចឧស្សាហ៍ទៅអុជធូបជាមួយកន្លែងជំនាងផ្ទះ ឬ កន្លែងកុងម៉ារបស់អ្នក គឺល្អខ្លាំង។
៦. ឆ្នាំម្សាញ់
រាសីក្នុងខែនេះ គឺរាសីរបស់អ្នកមានភាពល្អប្រសើរគួរសម ដូចនេះអ្នកត្រូវចេះគ្រប់គ្រងការងាររបស់អ្នកឱ្យបានល្អបំផុតតាមដែលអាចធ្វើទៅបាន កុំលោភលន់ ធ្វើមួយៗ បានផលលឿនជាងធ្វើការប្រញាប់ៗ។ ប្រយ័ត្នគ្រោះថ្នាក់ចរាចរណ៍ ជាពិសេសបើសិនជាអ្នកកំពុងប្រើប្រាស់យានយន្តពណ៌ខ្មៅ។
ដំណោះស្រាយ ៖ សូមធ្វើបុណ្យចែកអាហារយ៉ាងតិច ៨ ឈុតអាហារដល់អ្នកក្រីក្រ អាចធ្វើឱ្យអ្នកកាន់តែមានរាសីល្អបន្ថែមទៀត។
៧. ឆ្នាំមមី
ខែនេះ បញ្ហាដែលធ្លាប់កើតមានកន្លងមកក្នុងគ្រួសារខ្លួនឯង គឺអាចដោះស្រាយបានល្អខ្លាំង សម្រាប់ការរកស៊ីវិញ គឺមានភាពល្អធម្មតា តាមជាក់ស្ដែង មិនមានអ្វីដែលគួរបារម្ហដោយសាររាសីរបស់អ្នកនោះទេ។ សម្រាប់សុខភាពវិញ អាចងាយឈឺបន្តិច ភាគច្រើនចុកឆ្អឹង ចុកស្មា ចុកជើងជាដើម អាចប្រើប្រាស់ប្រេងរឹតតាមទម្លាប់បាន។
ដំណោះស្រាយ ៖ សូមព្យាយាមធ្វើបុណ្យថ្វាយផ្កាក្រអូបដល់ព្រះឱ្យបានច្រើន អ្នកកាន់តែប្រសើរជាងពេលនេះទៅទៀត។
៨. ឆ្នាំមមែ
រាសីអ្នកក្នុងខែនេះ មិនសូវល្អទេ បញ្ហាគ្រោះថ្នាក់នៅតំបន់ភ្នំ តំបន់សមុទ្រ សូមប្រុងប្រយ័ត្នគ្រោះថ្នាក់កើតចេញពីម៉ាស៊ីនធំៗ ឬ ប្រភេទម៉ូទ័រផ្សេងៗ សម្រាប់អ្នកមានស្នេហា អាចមានបញ្ហាបែកបាក់ដោយសាររឿងតិចតួចបំផុត។
ដំណោះស្រាយ ៖ សូមអ្នកព្យាយាមលែងត្រីទឹកសាបចំនួន ៨ ក្បាល ចូលក្នុងទឹកទន្លេនោះគ្រប់យ៉ាងអាចល្អប្រសើរបានច្រើនគួរសម។
៩. ឆ្នាំវក
រាសីខែនេះ រាសីល្អគួរសម សម្រាប់អ្នកកំពុងមានបញ្ហាឈ្លោះគ្នាក្នុងរឿងស្នេហា គឺអាចត្រូវគ្នាវិញក៏ថាបានដែរ សម្រាប់អ្នកឆ្នាំវក ដែលកំពុងមានជំងឺប្រចាំកាយ សូមប្រុងប្រយ័ត្នព្រោះខែនេះផ្កាយជំងឺអាចមានថាមពលខ្លាំងបន្តិច អាចធ្វើឱ្យជំងឺធ្វើទុក្ខខ្លាំង ដូចនេះសូមប្រុងប្រយ័ត្នឱ្យបានខ្ពស់ ហើយប្រើប្រាស់ថ្នាំតាមពេទ្យឱ្យបានដិតដល់។
ដំណោះស្រាយ ៖ សូមព្យាយាមធ្វើបុណ្យចែកទឹក ដល់អ្នកត្រូវការឱ្យបានច្រើនបំផុតគឺល្អខ្លាំង ហើយអាចធ្វើឱ្យរាសីអ្នកកាន់តែល្អប្រសើរជាងនេះមួយកម្រិតទៀត។
១០. ឆ្នាំរកា
រាសីអ្នកឆ្នាំរកា គឺមានភាពល្អប្រសើរខ្លាំង សូមប្រយ័ត្នតែរឿងមួយទេ បើអាចកុំជិះយន្តហោះ វាមិនអាចបង្ករគ្រោះថ្នាក់អ្វីទេ គ្រាន់តែពេលអ្នកហោះហើរ គឺអាចប៉ះរាសីរបស់អ្នក អាចធ្វើឱ្យរាសីល្អរបស់អ្នកនាពេលនេះ ប្រែជាធ្លាក់ចូលក្នុងរាសីមិនល្អរបស់អ្នកវិញជាមិនខាន។
ដំណោះស្រាយ ៖ ក្នុងករណីអ្នកជិះយន្តហោះនានា សូមអ្នករកមើលខ្សែដៃដែលមានពណ៌ចំរុះ ៥ ពណ៌ ខុសគ្នា ( ក្រហម ទឹកប៊ិច បៃតង ស លឿង) ដើម្បីទប់រាសីរបស់អ្នកឱ្យបាននឹងនរល្អ។
១១. ឆ្នាំច
រាសីក្នុងខែនេះ មានបញ្ហាជាមួយដៃគូប្រកួតប្រជែង ឬ ដៃគូដែលមិនសូវពេញចិត្តជាមួយអ្នក រក្សាចិត្តឱ្យបានល្អ គឺគ្រប់យ៉ាងបានល្អបំផុត ការងារព្យាយាមដោះស្រាយបញ្ហាផ្ទៃក្នុងរបស់ខ្លួនឯងឱ្យបានល្អ គួរផ្ដល់ពេលវេលាឱ្យខ្លួនឯង ប្រយ័ត្នបញ្ហារអិលដួលជាមួយទឹក ឬកន្លែងសន្សើមៗ ប្រយ័ត្នការខាតបង់ប្រាក់កាក់លើការជឿទុកចិត្តអ្នកដទៃ ប្រយ័ត្នការឈឺចាប់កណ្ដាលខ្នង ឬស្មាទាំងសងខាង។
ដំណោះស្រាយ ៖ សូមព្យាយាមធ្វើបុណ្យសំពះព្រះ ថ្វាយពន្លឺភ្លើងទៀនដល់ទេវតា ឬទីវត្តអារាមឱ្យបានច្រើនកាន់តែល្អ សូមប្រុងប្រយ័ត្នគ្រប់ពេលវេលាទាំងអស់។
១២. ឆ្នាំកុរ
ជាទូទៅ ឆ្នាំកុរ ខែនេះនៅតែបន្តមានលាភដូចខែមុនៗដែរ តែក្នុងខែនេះអ្នកត្រូវប្រឹងបន្តិច គឺប្រឹងខ្លាំងយកតែម្ដង មេជេរកាន់តែច្រើន ការងារអ្នកកាន់តែបានផល រឿងត្រូវប្រយ័ត្ន គឺប្រយ័ត្នអ្នកខ្ជិលខ្លាំង នាំឱ្យអ្នកខាតពេលវេលាដ៏ល្អមួយនេះ។
ដំណោះស្រាយ ៖ សូមព្យាយាមដោះស្រាយត្រាំទឹកក្ដៅ ងូតទឹកក្ដៅឱ្យបានច្រើន គឺជីវិតអ្នកប្រាកដជាល្អប្រសើរជាងនេះ៕
