ការមានមិត្តច្រើនមិនប្រាកដថា អ្នកជាមនុស្សអស្ចារ្យនោះទេ តែការមានមិត្តពិតប្រាកដ ឬមិត្តគុណភាព ទើបជាអំណោយដ៏មានតម្លៃបំផុតនៅក្នុងជីវិត។ តួយ៉ាង តាមរយៈការចែករំលែករបស់ទំព័រហ្វេសប៊ុក ផ្នត់គំនិតសហគ្រិន បានលើកឡើងអំពីមិត្តពិត ដោយសម្រាយយ៉ាងសមហេតុផលដូចខាងក្រោម ៖
«មិត្តពិតក្នុងជីវិត»
ក្នុងមួយជីវិតមនុស្សយើងនេះ ៖
មិត្តភក្តិមិនមែនមានច្រើនទើបល្អនោះទេ! អ្វីដែលសំខាន់គឺត្រូវមើលថា នរណាអាចទាញយើងឱ្យងើបឈរវិញបាន នៅពេលយើងដួល ហើយ នរណាអាចនៅក្បែរយើងមិនឃ្លាត នៅពេលយើងជួបទុក្ខលំបាក។ ចាំ! ចំនួនមិត្តមិនសំខាន់ប៉ុនគុណភាពនៃមិត្តភាពឡើយ។
កុំរាប់មិត្តតាមចំនួន តែរាប់មិត្តតាមតម្លៃ! ពិតណាស់ ក្នុងជីវិតយើងបានស្គាល់មនុស្សរាប់រយ រាប់ពាន់នាក់ ប៉ុន្តែមិនមែន “ញាតិ” ទាំងអស់សុទ្ធតែសមនឹងឱ្យយើងទុកចិត្ត ឬរាប់អានយ៉ាងជិតស្និទ្ធនោះទេ! ដូចគ្នានេះដែរ ក៏មិនមែន “មិត្តភក្តិ” គ្រប់រូបសុទ្ធតែស័ក្តិសមនឹងឱ្យយើងបញ្ចូលមកក្នុងរង្វង់ជីវិតរបស់យើងដែរ។ ទំនាក់ទំនងខ្លះ ត្រឹមតែស្គាល់គ្នាប៉ុណ្ណោះគឺគ្រប់គ្រាន់ហើយ មិនចាំបាច់ទៅលូកជ្រៅឡើយ។ អារម្មណ៍ខ្លះ ទុកនៅក្នុងចិត្តទៅបានហើយ មិនបាច់បង្ហាញ ឬប្រាថ្នាច្រើនពេកទេ។
មិត្តពិតប្រាកដ មិនមែននៅជុំគ្នានៅតុផឹកស៊ីសប្បាយរីករាយជាមួយយើងតែនៅពេលយើងមានបាននោះទេ! ប៉ុន្តែពួកគេស្ថិតនៅក្បែរអ្នក នៅពេលដែលអ្នកជួបការលំបាកបំផុត នៅពេលអ្នកអស់សង្ឃឹម គ្មានអ្នកណាមើលឃើញតម្លៃរបស់អ្នក។ ពួកគេសុខចិត្ត លះបង់ដើម្បីជួយអ្នកទាំងត្រដាបត្រដួស ប្រៀបដូចជា “ឱ្យធ្យូងនៅពេលមានព្រិលធ្លាក់” ដែលសំដៅលើការជួយសង្គ្រោះនៅពេលចាំបាច់បំផុត។ ពួកគេមិនមែនជាមនុស្សដែលឈរមើលអ្នកដោយព្រងើយកន្តើយនោះទេ! តែជាអ្នកដែលលូកដៃជួយ ដោយគ្មានលក្ខខណ្ឌ។
ដូច្នេះ យើងត្រូវចេះពិចារណា និង វាយតម្លៃមិត្តភក្តិ ដោយផ្អែកលើទង្វើរបស់ពួកគេ មិនមែនគ្រាន់តែពាក្យសម្ដីផ្អែមល្ហែម ឬការសន្យាទទេឡើយ! មិត្តពិតនឹងនៅក្បែរអ្នកពេលអ្នកជួបទុក្ខលំបាក មិនមែនគ្រាន់តែមកលេចមុខពេលអ្នកមានក្ដីសុខនោះទេ!៕
