នៅថ្ងៃទី ០៥ ខែឧសភា ឆ្នាំ ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាឱ្យពិនិត្យឱ្យបានតឹងរ៉ឹង ពាក់ព័ន្ធនឹងការនាំចូលបន្ថែ សាច់ និង ការប្រើប្រាស់ជាតិគីមីផ្សេងៗលើអាហារ ដើម្បីកាត់បន្ថយជំងឺមហារីក។ សម្ដេចបានថ្លែងបែបនេះ ក្នុងពីធីប្រកាសដាក់ឱ្យអនុវត្តជាផ្លូវការ «ផែនការជាតិប្រយុទ្ធនឹងជំងឺមហារីក២០២៥-២០៣០» ក្រោមធិបតីភាពសម្តេចបវរធិបតី ហ៊ុន ម៉ាណែត, លោក ឈាង រ៉ា រដ្ឋមន្ត្រីក្រសួងសុខាភិបាល និង បន្ទាប់ពីមានរបាយការណ៍ក្នុងមួយឆ្នាំៗ កម្ពុជាមានអ្នកកើតជំងឺមហារីកថ្មី ២ ម៉ឺនករណី ក្នុងនោះស្លាប់ ១.៤ ម៉ឺនករណី ពោលគឺ ៤០ នាទីស្លាប់ម្នាក់ ឬ ៣៨ នាក់ក្នុង ១ ថ្ងៃ។
តាមរយៈលោករដ្ឋមន្ត្រីក្រសួងសុខាភិបាល ឈាង រ៉ា បានបញ្ជាក់ថា ជារៀងរាល់ឆ្នាំប្រទេសកម្ពុជា មានអ្នកកើតជំងឺមហារីកថ្មីប្រមាណ ២០ ០០០ ករណី។ ជារៀងរាល់ឆ្នាំ ប្រជាពលរដ្ឋប្រមាណ ១៤ ០០០ នាក់ បានបាត់បង់ជីវិតដោយសារជំងឺនេះ ដែលតួលេខទាំងពីរនេះ ដែលត្រូវឆ្លុះបញ្ចាំងអំពីសារៈសំខាន់ និង ភាពបន្ទាន់នៃការដែលត្រូវចាត់វិធានការទប់ស្កាត់។
ក្នុងនោះ សម្តេចមហាបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះ «ឯកឧត្តម ឈាង រ៉ា ក៏បានលើកឡើងអំពីមូលហេតុមួយចំនួន ដែលកើតមហារីក ទី១ អាហារូបត្ថម្ភ បន្លែ សាច់ ឬអាហារផ្សេងៗ ទី២ អស់សុពលភាព ខូចកម្រិត ឬក៏គីមីច្រើន ទី៣ ពាក់ព័ន្ធនឹងរឿងកីឡា រឿងសុខភាព ហូបត្រឹមត្រូវក៏ដោយ បើអត់កីឡាក៏សុខភាពមានបញ្ហា»។
សម្តេចមហាបវរធិបតី ហ៊ុន ម៉ាណែត បានបន្តថា «ប៉ុន្តែសំខាន់បំផុត គឺការចូលរួមនៅក្នុងការបង្ការ ទី១ ក្រសួងស្ថាប័នពាក់ព័ន្ធ ក្រសួងពាណិជ្ជកម្ម ក្រសួងសុខាភិបាល ក្រសួងកសិកម្ម រុក្ខាប្រមាញ់ និង នេសាទ អគ្គនាយកដ្ឋានគយ និង រដ្ឋាករ និង អាជ្ញាធរពាក់ព័ន្ធពិនិត្យឱ្យបានតឹងរ៉ឹង ពាក់ព័ន្ធនឹងការនាំចូលបន្ថែសាច់ ការប្រើប្រាស់ជាតិគីមីផ្សេងៗ ឱ្យបានហ្មត់ចត់ ដើម្បីកាត់បន្ថយមហារីក។ ក្រសួងអប់រំ អប់រំនៅតាមសាលា ដើម្បីឱ្យដឹងពីវិធីបង្ការ និង ចៀសវាង ក្នុងការបរិភោគ ឬធ្វើសកម្មភាពណាមួយ ដែលនាំឱ្យកើតមហារីក។ ទី ២ ការខិតខំបង្កើនចាក់ថ្នាំបង្ការ ចាក់វ៉ាក់សាំងបង្ការ»៕
ប្រភព ៖ Fresh News
