មកដល់ពេលនេះ រយៈពេលជាងកន្លះឆ្នាំមកហើយ ដែលបវរកញ្ញា រឿន ណាត និង លោក លាង វេងហួរ បានឃ្លាតឆ្ងាយពីការងារសិល្បៈ និង វិស័យបវរកញ្ញា ដោយអ្នកទាំងពីរបានដឹកដៃគ្នាទៅរស់នៅសាងគ្រួសារលើទឹកដីសហរដ្ឋអាមេរិក បន្ទាប់ពីភ្ជាប់ពាក្យតាមប្រពៃណីខ្មែររួច។
ក្រោយរស់នៅលើទឹកដីអាមេរិកមួយរយៈ បវរកញ្ញា និង បុរសឯកមួយគូនេះ ក៏បានប្ដូរឈ្មោះពីគូដណ្ដឹងទៅជាស្វាមីភរិយាស្របច្បាប់ហើយដែរ ក្រោយពីបានឃើញរៀបចំពិធីមង្គលការបែបបស្ចឹមប្រទេសយ៉ាងសាមញ្ញមួយនៅសហរដ្ឋអាមេរិក។
លើសពីនេះ បន្ទាប់ពីរៀបការក្លាយជាប្ដីប្រពន្ធស្របច្បាប់នេះដែរ អ្នកទាំងពីរក៏បានបន្តបង្ហាញសកម្មភាពចាប់ដៃគ្នារស់នៅលើទឹកដីសហរដ្ឋអាមេរិក ដែលកំពុងសាងជីវិតគ្រួសារយ៉ាងមានក្ដីសុខនៅទីនោះ ខណៈឃើញអ្នកនាង រឿន ណាត តែងបង្ហាញពីក្ដីសុខក្នុងជិវីតប្ដីប្រពន្ធថ្មីថ្មោង ដែលនាងបានស្វាមីល្អដូចបំណង ជាបុរសពូកែយល់ចិត្ត មើលថែ និង គិតគូរសុខទុក្ខភរិយាគ្រប់សព្វ។
ដោយឡែក មកដល់ថ្មីៗនេះ បវរកញ្ញា រឿន ណាត កាន់តែបង្ហាញចិត្តឆ្ងាយណាយជីវិតសិល្បៈ និង ភាពល្បីល្បាញ ខណៈរស់នៅសាងជីវិតគ្រួសារជាមួយស្វាមីកាន់តែមានក្ដីសុខសុភមង្គល ដែលនាងចង់រស់បែបជីវិតសាមញ្ញមួយ មានត្រឹមតែស្វាមីបណ្ដូលចិត្តក៏មានក្ដីសុខគ្រប់គ្រាន់៕
