បើគិតមកដល់ពេលនេះ រយៈពេលប្រមាណជាង ១ ឆ្នាំមកហើយ ដែលកូនប្រុសទី ២ របស់កំពូលតារាចម្រៀងឧកញ៉ា ព្រាប សុវត្ថិ គឺលោក សុវត្ថិ មុនីនាគ បានបាត់វត្តមានក្នុងវិថីសិល្បៈនៅប្រទេសកម្ពុជា។
ក្នុងនោះ គេបានដឹងថា ការបាត់មុខនេះគឺលោក សុវត្ថិ មុនីនាគ បានធ្វើដំណើរទៅកាន់សហរដ្ឋអាមេរិក ដើម្បីបំពេញក្តីស្រមៃក្នុងដំណើរសិល្បៈបន្ថែម ដោយបច្ចុប្បន្នលោកកំពុងសិក្សាផ្នែករាំ និង ច្រៀងនៅឯ Millennium Dance Complex នៅរដ្ឋ Los Angeles។
យ៉ាងណាមិញ ក្រោយសំងំហ្វឹកហាត់នៅសហរដ្ឋអាមេរិកមួយរយៈធំ លោក សុវត្ថិ មុនីនាគ បានបង្ហាញសមិទ្ធផលយ៉ាងពិសេសលើវិស័យចម្រៀង និង រាំហើយដែរ ដោយលោកបានបញ្ចេញ Album ចម្រៀងរួចរាល់ ដោយមានការគាំទ្រយ៉ាងខ្លាំង។ លើសពីនោះ អ្វីដែលកាន់តែធ្វើឱ្យសិល្បករកម្ពុជាវ័យក្មេងរូបនេះ កាន់តែលេចធ្លោក្នុងឧស្សាហកម្មតន្ត្រីអន្តរជាតិ លោកសុវត្ថិ មុនីនាគ ក៏បានដាក់ឈ្មោះហៅក្រៅក្នុងសិល្បៈថា N.John។
ថ្មីៗនេះដែរ លោក N.John បានបង្ហោះនូវវីដេអូមួយកាលពីមួយឆ្នាំមុន ក្នុងថ្ងៃដំបូងនៃដំណើរចាប់ផ្តើមខ្សែជីវិតរស់នៅឯសហរដ្ឋអាមេរិកតែម្នាក់ឯង បន្ទាប់ពីឧកញ៉ា ព្រាប សុវត្ថិ ជាឪពុក និង អ្នកម្តាយបានជូនដំណើរកូនប្រុសទៅរស់នៅសហរដ្ឋអាមេរិក ធ្វើឱ្យអ្នកគាំទ្ររំជួលចិត្តយ៉ាងខ្លាំង។
ម្យ៉ាងវិញទៀត កាលពីថ្ងៃទី ២៤ ខែមិថុនា ឆ្នាំ ២០២៥ លោក N.John ក៏បានប្រាប់នូវដំណឹងដ៏ល្អក្នុងនាមជាសិល្បករកម្ពុជាមួយរូបដែរ ដោយលោកទទួលបាន O-1B visa ដែលជាទិដ្ឋាការស្របច្បាប់ក្នុងនាមជាសិល្បករនៅសហរដ្ឋអាមេរិក បន្ទាប់ពីលោកទទួលបានជោគជ័យខ្ពស់ និង ការទទួលស្គាល់ក្នុងការខិតខំប្រឹងប្រែងច្នៃប្រឌិតនៃសិល្បៈរបស់លោកនៅទីនោះ៕
សូមចុចទីនេះ ដើម្បីទស្សនាវីដេអូ៖
