មហាជនអ្នកប្រើប្រាស់បណ្ដាញសង្គម បាននាំគ្នាចែករំលែកបន្តគ្នាព្រោងព្រាត នូវឆន្ទៈស្នេហាការពារបូរណភាពទឹកដី របស់លោកពូមួយរូប ដែលលោកពិការជើងពិតមែនក្ដី តែមានបេះដូងស្នេហាជាតិមាតុភូមិមិនរួញរា រួមចំណែកយ៉ាងសកម្ម រុះរើបន្លាលួសដែលទាហានឈ្លានពានថៃបានដាក់ នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នៅថ្ងៃទី ១៦ ខែកញ្ញា ឆ្នាំ ២០២៥។
សកម្មភាពដ៏អង់អាចរបស់លោកពូ ត្រូវបានបង្ហោះនៅថ្ងៃទី ១៦ ខែកញ្ញា ឆ្នាំ ២០២៥ ដោយផេកផ្លូវការរបស់កីឡាការនីតំណាងកម្ពុជា Sroung Pheavy ភ្ជាប់ជាមួយសារគោរពសរសើរថា ៖ «ទោះលោកពូពិការ ក៏មានបេះដូងស្នេហាជាតិមាតុភូមិកម្ពុជា ដោយស្មោះ ឃើញរូបភាពនេះហើយ ពិតជាក្ដុកក្ដួលណាស់ នេះជារូបភាពរបស់គាត់ ដែលយកជើងពិការទាត់បន្លាលួស របស់សៀម ដែលយកមកព័ទ្ធនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ 16/9/2025»។
តាមរយៈសកម្មភាពនេះ បានធ្វើឱ្យអ្នកប្រើប្រាស់បណ្ដាញសង្គមហ្វេសប៊ុក នាំគ្នាចែករំលែកព្រោងព្រាត ព្រមទាំងស្ងើចសរសើរនូវវីរភាពដ៏អង់អាចប្រឆាំងការឈ្លានពានរបស់ថៃ ដ្បិតថាលោកពូពិការក៏ពិតមែន តែលោកមានឆន្ទៈស្នេហាការពារបូរណភាពទឹកដី មិនភ័យខ្លាចតក់ស្លុតបន្តិចនោះឡើយ៕
