ក្រៅពីមមាញឹកការងារនៅក្រុមហ៊ុន និង ជាប្រធានសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន ក៏ជាឧត្តមភរិយា និង ជាអ្នកម្តាយឆ្លាតវៃមួយរូប ដែលតែងបង្កើតសុភមង្គលដល់គ្រួសារ។ តាមរយៈបទពិសោធផ្ទាល់ខ្លួន ថ្មីៗនេះ លោកជំទាវ ក៏បានចែករំលែកអំពីគន្លឹះក្នុងការចិញ្ចឹមកូនឱ្យចេះស្រលាញ់គ្នាផងដែរ។
លោកជំទាវអ្នកឧកញ៉ា ម៉ៅ ចំណាន បានសរសេរបង្ហោះនៅលើទំព័រហ្វេសប៊ុកយ៉ាងដូច្នេះថា៖ «មានគេធ្លាប់សួរនាងខ្ញុំថា «តើនាងខ្ញុំធ្វើដូចម្ដេចទើបចិញ្ចឹមកូនៗឱ្យចេះស្រលាញ់គ្នា?»
ប្រហែលជាបងប្អូនមួយចំនួនក៏ធ្លាប់ឆ្ងល់ដែរថា ភាពជាបងប្អូនបានបង្រៀនកូនៗរបស់នាងខ្ញុំឱ្យចេះស្រលាញ់ ចេះជួយគ្នាបែបណានោះ បើទោះបីជាពេលខ្លះពួកគេមានការខ្វែងគំនិតគ្នាខ្លះក៏ដោយ។
នាងខ្ញុំតែងរម្លឹកថា ជាធម្មតាបងប្អូន គឺជាទំនាក់ទំនងមួយដ៏ជ្រាលជ្រៅបំផុតដែលយើងទទួលបានក្នុងជីវិត។ វាជាអ្វីដែលកូនៗត្រូវរៀនចេះចែករំលែក ចេះអត់ឱន បើទោះជាឈ្លោះទាស់ទែងគ្នាក៏ដោយ ក៏ត្រូវតែបន្តយកចិត្តទុកដាក់ចំពោះគ្នាទៅវិញទៅមក។
ពិតណាស់ កូនៗរបស់នាងខ្ញុំ ក៏មិនខុសពីកូនៗរបស់បងប្អូនប៉ុន្មានដែរ។ ពួកគេញ៉េះញ៉ោះគ្នា ពេលខ្លះក៏ឈ្លោះគ្នា ហើយពេលខ្លះទៀតមានសម្ដីធំតូចដាក់គ្នាផងដែរ។ ប៉ុន្តែត្រូវចាំថានៅក្រោមភាពមិនចុះសម្រុងគ្នានោះ គឺមានចំណងនៃក្ដីស្រលាញ់មួយដែលយើងខំប្រឹងការពារជានិច្ច។
គ្រួសារនីមួយៗមិនដូចគ្នាទេ ប៉ុន្តែសម្រាប់គ្រួសារនាងខ្ញុំ យើងតែងតែរម្លឹកពួកគេជានិច្ចថា ក្នុងនាមជាបងប្អូន មានន័យត្រូវតែចេះស្រលាញ់គ្នាទៅវិញទៅមក ប្រៀបដូចជាមិត្តភក្ដិដំបូង ជាដៃគូដំបូង និង ជាកន្លែងដំបូងដែលផ្ដល់នូវសុវត្ថិភាព។
យើងតែងតែនិយាយប្រាប់ពីអារម្មណ៍រៀងៗខ្លួនដោយបើកចំហ។
យើងតែងធ្វើជាគំរូឱ្យពួកគេចេះសុំទោស ហើយយើងរីករាយសាទរនៅពេលដែលពួកគេចេះត្រូវគ្នាវិញ។
យើងក៏បង្រៀនពួកគេថា ក្នុងនាមជាបងប្អូនគឺមានន័យថាត្រូវតែចេះយឹតយោងគ្នាទៅវិញទៅមកនៅពេលដែលជួបលំបាក ហើយយ៉ាងណាត្រូវតែចេះការពារគ្នា លើកមុខមាត់គ្នា អភ័យទោសឱ្យគ្នា និង ធ្វើល្អដាក់គ្នា ទោះបីវាមិនមែនជារឿងងាយស្រួលក៏ដោយ។
ទាំងនេះមិនត្រឹមតែជាមេរៀនក្នុងការប្រៀនប្រដៅកូននោះទេ ប៉ុន្តែគឺជាមេរៀនជីវិត ពីព្រោះនៅពេលដែលក្មេងៗធំឡើងបានរៀនចេះប្ដូរពីជម្លោះទៅជាការផ្ដល់ក្ដីស្រលាញ់ នោះពួកគេនឹងក្លាយជាមនុស្សដែលចេះរក្សាទំនាក់ទំនង ទោះបីជាជីវិតជួបការលំបាកយ៉ាងណាក៏ដោយ។
នេះគឺជារបៀបដែលយើងបង្រៀនឱ្យក្នុងចិត្តចេះផ្ដល់ស្រលាញ់ ដោយមិនត្រឹមតែក្នុងគ្រួសារនោះទេ ពោលគឺសម្រាប់ជាទូទៅ»៕
