ក្រឡេកមកផលិតផលក្នុងស្រុក គ្រាប់ស្វាយចន្ទី ជាគ្រាប់ធញ្ញជាតិអាចដាំដុះក្នុងស្រុក និង ផលិតដោយខ្លួនឯងបាន ជាពិសេស មានរសជាតិឆ្ងាញ់ គ្មានសារធាតុគីមី។ តួយ៉ាង ដូចជា ហ្រ្គីនលីវីង (Green Living) ដែលជាសិប្បកម្មកែច្នៃ និង វេចខ្ចប់គ្រាប់ធញ្ញជាតិ និង ផ្លែឈើ បានផលិតគ្រាប់ស្វាយចន្ទី ដែលមានគុណភាពខ្ពស់ រសជាតិឆ្ងាញ់ ប្រមូលផលមកពីខេត្តកំពង់ធំ។
តាមរយៈវីដេអូសម្ភាសជាមួយ សហគ្រិនខ្មែរ សហស្ថាបនិកនៃសិប្បកម្ម ហ្រ្គីនលីវីង បានឱ្យដឹងថា សិប្បកម្មនេះ បានបង្កើតឡើងនៅក្នុងឆ្នាំ ២០១៩ ដោយគ្រាប់ស្វាយចន្ទី ត្រូវបានប្រមូលផលមកពីខេត្តកំពង់ធំ។ ដើម្បីធានាគុណភាព ខាងសិប្បកម្មបានជ្រើសរើសគ្រាប់ស្វាយចន្ទី មកកែច្នៃរសជាតិ និង វេចខ្ចប់ស្របទៅតាមស្តង់ដានៃប្រទេសកម្ពុជា។
អំឡុងបើកដំណើរការដំបូង សិប្បកម្មបានជួបវិបត្តិកូវីដ ដែលធ្វើឱ្យប៉ះពាល់ដល់ការស្តុកវត្ថុធាតុដើម និង ចង្វាក់ផលិតកម្ម រហូតស្ទើរតែបិទទ្វារទាំងស្រុង។ ក្រោយបញ្ហាកូវីដធូរស្បើយ ជាសំណាង សិប្បកម្មទទួលបានកញ្ចប់ជំនួញពី សហគ្រិនខ្មែរ ហើយក៏បានរៀបចំស្តារឡើងវិញ ប្រមូលស្តុកថ្មី អភិវឌ្ឍការផលិតមានទីផ្សារមកដល់សព្វថ្ងៃ។
បច្ចុប្បន្ន ផលិតផលរបស់ ហ្រ្គីនលីវីង មានដាក់លក់គ្រប់ទីផ្សារនៅក្នុងប្រទេសកម្ពុជា។ ក្រៅពីគ្រាប់ស្វាយចន្ទី ខាងសិប្បកម្មក៏បានកែច្នៃគ្រាប់ធញ្ញជាតិផ្សេងទៀត ដូចជា គ្រាប់អាល់ម៉ុន គ្រាប់រីករាយ គ្រាប់វ៉លណាត់ ដែលជាគ្រាប់នាំចូល ជាមួយគុណភាព និង រសជាតិ កម្រិតស្តង់ដា ផងដែរ៕
