នៅថ្ងៃទី ៣ ខែធ្នូ ឆ្នាំ ២០២៥ នេះ នៅប្រទេសថៃ មានករណីគ្រោះថ្នាក់ចរាចរណ៍មួយដ៏គួរឱ្យរន្ធត់ ដែលឡានមួយគ្រឿងបានបើកធ្លាក់ប្រឡាយ បង្កឱ្យមានមនុស្សស្លាប់រហូតដល់ទៅ ៩ នាក់។
តាមព័ត៌មានបានឱ្យដឹងថា ហេតុការណ៍បានកើតឡើងនៅប្រឡាយមួយខ្សែ នាក្រោយវត្ត Ratsamanchan ឃុំ Nong Krathum ស្រុក Pak Tho ខេត្ត Ratchaburi។ រថយន្តខាងលើនេះ ជាប្រភេទរថយន្ត Toyota Fortuner បានលបលួចដឹកពលករចំណាកស្រុកខុសច្បាប់ចំនួន ១៥ នាក់ លុះមកដល់កន្លែងកើតហេតុ ត្រូវបានគេសន្និដ្ឋានថា បានផ្ទុះបែកកង់ រួចក៏រេចង្កូតធ្លាក់ទៅក្នុងប្រឡាយតែម្តង។
យ៉ាងណាមិញ តាមព័ត៌មានបានឱ្យដឹងថា ករណីនេះមានអ្នកស្លាប់ចំនួន ៩ នាក់ និង ៦ នាក់ទៀតបានរួចជីវិត រួមទាំងអ្នកបើកបរ តែពួកគេបាននាំគ្នារត់គេចខ្លួនអស់ក្រោយពីកើតហេតុ។ មកទល់ពេលនេះអាជ្ញាធរកំពុងតែតាមស្វែងរកអ្នកទាំង ៦ នាក់នោះ និងវាស់វែងប្រមូលភស្តុតាងផ្សេងៗដើម្បីដំណើរការក្តីទៅតាមផ្លូវច្បាប់៕
ប្រភព៖ Khaosod
