តាមរយៈលិខិតចុះថ្ងៃទី ១៨ ខែកុម្ភៈ ឆ្នាំ ២០២៥ ទីស្ដីការគណៈរដ្ឋមន្ត្រី បានបង្ហាញពីរបាយការណ៍ស្តីពីការហាមឃាត់ការនាំចូលផ្លែទុរេនស្រស់ ពីសាធារណរដ្ឋសង្គមនិយមវៀតណាម និង ព្រះរាជាណាចក្រថៃ របស់អាជ្ញាធរគយនៃសាធារណរដ្ឋប្រជាមានិតចិន ក្រោយរកឃើញមានផ្ទុកសារធាតុ Basic Yellow 2 ឬ Auramine O និង Cadmium។
ទាក់ទិនទៅនឹងករណីនេះ តាមរយៈចំណារដ៏ខ្ពង់ខ្ពស់បំផុត របស់សម្តេចមហាបវរធិបតី ហ៊ុន ម៉ាណែត ចុះថ្ងៃទី ១៣ ខែកុម្ភៈ ឆ្នាំ ២០២៥ បានបញ្ជាក់ថា រាជរដ្ឋាភិបាល បានឃើញ និង សម្រេចឱ្យក្រសួងពាណិជ្ជកម្ម ត្រូវយកចិត្តទុកដាក់ទាំងការនាំចូលទុរេន និង ការដាំដុះក្នុងប្រទេស និង ត្រូវពន្លឿនកិច្ចការរៀបចំកសាងសមត្ថភាពមន្ទីរពិសោធលើការវិភាគរកសារធាតុ Basic Yellow 2 ឬ Auramine O និង Cadmium ដោយចាត់ទុកជាការប្រញាប់ ក្នុងរយៈពេលដ៏ខ្លីខាងមុខ។
ការធ្វើបែបនេះ គឺដើម្បីជួយគាំទ្រដល់អគ្គនាយកដ្ឋានគយ និង រដ្ឋាករកម្ពុជា ក្នុងការវិភាគនៅតាមមាត់ច្រក នៅពេលដែលមានការនាំចូលផ្លែទុរេនស្រស់ ដែលមិនមានវិញ្ញាបនបត្របញ្ជាក់ និង ធានាមិនឱ្យមានការប្រើប្រាស់សារធាតុទាំងពីរនេះ លើផលិតផលក្នុងស្រុក ដើម្បីការពារដល់អ្នកបរិភោគ។
ដោយឡែក ទន្ទឹមនឹងចំណាត់ការហាមឃាត់របស់រាជរដ្ឋាភិបាល ថ្មីៗនេះនៅលើបណ្ដាញសង្គមហ្វេសប៊ុក ស្រាប់តែមហាជនឃើញមានគេផុសទុរេនលក់តាមអនឡាញ ១ គីឡូតម្លៃ ១៣ ០០០ រៀល ដោយអ្នកលក់អះអាងថាគឺជាទុរេនមេមត់ ខណៈអ្នកមេមត់ពិតប្រាកដលើកឡើងថា ទុរេនទើបនឹងក្ដឹបប៉ុណ្ណោះ៕
