សារព័ត៌មាន Daily Mails បានរាយការណ៍ពីរឿងរ៉ាវរបស់សបុរសចំណាស់ជនជាតិចិនម្នាក់ ដែលរដ្ឋមកសុំទិញដីទិញផ្ទះ ដើម្បីអភិវឌ្ឃន៍ធ្វើផ្លូវល្បឿនលឿន តែមិនព្រមលក់ ដល់ឥលូវបែរជាស្តាយក្រោយ ព្រោះត្រូវគេធ្វើផ្លូវព័ទ្ធជិតឈឹង។
បុរសរូបនេះបានរៀបរាប់ឱ្យដឹងថា ខាងរដ្ឋបានមកសុំទិញដីទិញផ្ទះរបស់ខ្លួនក្នុងតម្លៃប្រមាណជាង ២០ ម៉ឺនដុល្លារ ដើម្បីអភិវឌ្ឍន៍ធ្វើជាផ្លូវល្បឿនលឿន តែម្ចាស់មិនលក់ឱ្យឡើយ ហើយខាងរដ្ឋក៏សម្រេចធ្វើផ្លូវព័ទ្ធផ្ទះនោះតែម្តង។ យ៉ាងណាមិញ មកទល់ពេលនេះ បុរសរូបនេះក៏ចាប់ផ្តើមស្តាយក្រោយ ព្រោះត្រូវប្រទះបញ្ហាជាច្រើន ដូចជាត្រូវចេញពីផ្ទះរាល់ថ្ងៃ ដល់ល្ងាចទើបមកវិញ ព្រោះតែត្រូវរំខានដោយសំឡេងក្នុងការដ្ឋាន ហើយផ្ទះគឺពេញទៅដោយធូលីរាល់ថ្ងៃ សម្អាតមិនស្អាតសោះ ជួនកាលទៀតនោះផ្ទះក៏រញ្ជួញរង្គើ ពិតជាពិបាករស់នៅណាស់។
ដោយឡែក ផ្លូវល្បឿនលឿនខាងលើនៅមិនទាន់សាងសង់រួចនៅឡើយទេ តែបុរសរូបនេះក៏បានប្រទះបញ្ហាជាបណ្តើរៗហើយ ហើយក៏រឹតតែពិបាកចិត្តទៅទៀតបើសិនជាគេចាប់ផ្តើមបើកឱ្យធ្វើដំណើរ ព្រោះនឹងត្រូវជួបការរំខានច្រើនជាងនេះទៀត ពោលគឺបុរសរូបនេះពិតជាស្តាយក្រោយណាស់ ដែលមិនសម្រេចចិត្តលក់ផ្ទះឱ្យរដ្ឋ៕
ប្រភព៖ Sanook
