ថ្មីៗនេះ មហាជនអ្នកប្រើប្រាស់បណ្ដាញសង្គមជាច្រើនបានផ្ទុះការចែករំលែកវែកញែកខ្លាំងចំពោះវីដេអូមួយ ក្រោយពីបានស្ដាប់ការនិយាយរបស់ពិធីករកីឡាឈ្មោះ Mc Vutha បានប្រើពាក្យសម្ដីមិនសូវសមរម្យចំពោះនារីជា Model លើកស្លាកម្នាក់ក្នុងកម្មវិធីកីឡាមួយ។
ក្នុងនោះ អ្វីដែលធ្វើឱ្យអ្នកគាំទ្រផ្ទុះការមិនពេញចិត្ត និង ប្រតិកម្មខ្លាំងលើពិធីកររូបនេះ ក្រោយពីលោកបាននិយាយប្រើពាក្យសម្ដីបែបបញ្ឆិតបញ្ឆៀងលើរូបរាងកាយរបស់នារី Model ក្នុងកម្មវិធីកីឡានោះ ដែលមហាជនចាត់ទុកជាពាក្យសម្ដីបំពានមើលងាយដល់ស្រ្តីខ្មែរ។
ស្របគ្នានេះ ក្រឡេកមើលអ្នកលេងបណ្ដាញសង្គមក៏កំពុងផ្ទុះការបញ្ចេញមតិរិះគន់លើពិធិកររូបនេះ ព្រមទាំងចង់ឱ្យលោកចេញមុខសុំទោសជាសាធារណៈចំពោះនារី Model រូបនោះ និង អ្នកខ្លះចង់ឱ្យមានការដាក់ទោសតាមផ្លូវច្បាប់ទៀតផង។ យ៉ាងណាមិញ វីដេអូខ្លីបង្ហោះលើបណ្ដាញសង្គមនេះដែរ ក៏ត្រូវបាននារី Model ស្នើសុំឱ្យលុបចេញពីលើបណ្ដាញសង្គម ដែលនាងសុំរៀបចំចាត់ការតាមផ្លូវច្បាប់វិញ។
ក្រោយរងការរិះគន់ខ្លាំងពីមហាជនលើបណ្ដាញសង្គម ពេលនេះ MC Vutha ក៏បានចេញវីដេអូមួយដោយនិយាយសុំទោសទៅកាន់នារី Model ជុំវិញរឿងយកវីដេអូនេះបង្ហោះលើហ្វេសប៊ុក ដែលធ្វើឱ្យប៉ះពាល់ដល់កិត្តិយស និង សេចក្ដីថ្លៃថ្នូររបស់នាង។
យ៉ាងណា ចំពោះវីដេអូសុំទោសនេះដែរ កំពុងត្រូវបានមហាជនលើបណ្ដាញសង្គមចែករំលែក និង វែកញែកជាថ្មី ដោយក្នុងនោះមតិភាគច្រើនរបស់មហាជនគឺមិនសូវពេញចិត្តចំពោះការសុំទោសរបស់លោកឡើយ ដោយគិតថាលោកពុំទាន់បានទទួលកំហុសនូវពាក្យសម្ដីដែលលោកបាននិយាយទៅកាន់នារីរូបនោះនៅឡើយ គ្រាន់តែសុំទោសត្រឹមតែការកាត់តវីដេអូបង្ហោះដោយមិនមានការអនុញ្ញាតប៉ុណ្ណោះ៕
សូមចុចទីនេះដើម្បីទស្សនាវីដេអូ៖
