នៅថ្ងៃទី ២១ ខែកក្កដា ឆ្នាំ ២០២៥ នេះ ខាងកងទ័ពភូមិន្ទរបស់ថៃ បានឱ្យដឹងថា ពួកគេរកឃើញមានគ្រាប់មីនប្រភេទ PMN2 ចំនួន ២ គ្រាប់ទៀតហើយ នៅជិតកន្លែងកើតហេតុចាស់ ដែលទាហាន ៣ នាក់ បានជាន់ផ្ទុះរបួសកាលពីថ្ងៃ ១៦ ខែកក្កដា ឆ្នាំ ២០២៥ កន្លងទៅ។
គ្រាប់មីនខាងលើត្រូវបានរកឃើញដោយក្រុម Suranaree និងអង្គភាពមីនមនុស្សធម៌ទី ៣ កាលពីថ្ងៃទី ២០ ខែកក្កដា ឆ្នាំ ២០២៥ កន្លងទៅ នៅចម្ងាយ ៣០ សង់ទីម៉ែត្រ ពីកន្លែងចាស់ ហើយក្រុមទាំងពីរក៏បានធ្វើការដកគ្រាប់ទាំងនោះចេញរួចរាល់ហើយដែរ។
កងទ័ពភូមិន្ទរបស់ថៃបានចោទថានេះ គឺការរំលោភលើអធិបតេយ្យភាពរបស់ប្រទេស និង ការរំលោភលើអនុសញ្ញាទីក្រុងអូតាវ៉ា ក៏ជាចេតនាយ៉ាងច្បាស់ក្នុងការធ្វើបាបទាហានថៃ។ កងទ័ពបានស្នើសុំកិច្ចសហប្រតិបត្តិការពីរដ្ឋសមាជិកអាស៊ាន និងប្រទេសដទៃទៀត ឱ្យចូលរួមថ្កោលទោសកម្ពុជាចំពោះទង្វើមួយនេះ។ លើសពីនេះ នាយកដ្ឋានព័ត៌មានរបស់កងទ័ពភូមិន្ទថៃ នឹងអញ្ជើញជំនួយការទូតផ្នែកទាហាននៅក្នុងប្រទេសថៃទាំងអស់ ឱ្យមកស្តាប់ការពិតចំពោះហេតុការណ៍នេះផងដែរ៕
ប្រភព៖ AMARINTV
