ថ្មីៗនេះ លោកស្រី Wasana Nanuam ដែលជាអ្នកសារព័ត៌មានខាងយោធារបស់ថៃ បានទម្លាយរបាយការណ៍ពីភ្នាក់ងារសន្តិសុខជាតិថា កម្ពុជាបានរួមដៃគ្នាជាមួយពួក Hacker នៅកូរ៉េខាងជើង ដើម្បីមកវាយប្រហារប្រទេសថៃតាមប្រព័ន្ធ Cyber ក្រោយពីមានករណីជម្លោះនៅតាមព្រំដែន។
លោកស្រី Wasana Nanuam បានឱ្យដឹងថា នៅមិនទាន់ច្បាស់នៅឡើយទេថាការរួមដៃរវាង Hacker ទាំងពីរប្រទេសនេះ អាចមាននរណាជាអ្នកជួលនៅពីក្រោយខ្នង ឬក៏ខាងរដ្ឋបានប្រើទំនាក់ទំនងរវាងប្រទេសដើម្បីធ្វើសកម្មភាពនេះ។ ទាក់ទងនឹងនេះ លោកឧត្តមសេនីយឯក Chatchai Chaikasem មេបញ្ជាការយោធា Cyber បានលើកឡើងដល់គណៈកម្មាធិការថវិកាសភាកាលពីថ្ងៃទី ២៧ ខែមិថុនា ឆ្នាំ ២០២៥ កន្លងទៅ អំពីផែនការប្រើប្រាស់ថវិកាចំនួន ៩៧ លានបាត ដើម្បីអភិវឌ្ឍកងបញ្ជាការ Cyber 4 ដែលទើបតែបង្កើតឡើងកាលពីខែតុលា ឆ្នាំ ២០២៤ កន្លងទៅ ដោយអះអាងថា ប្រព័ន្ធ Cyber គឺជាប្រយុទ្ធបែប IT ប្រព័ន្ធកុំព្យូទ័រ ទាំងការប្រើអ៊ីនធឺណេត និង មិនប្រើអ៊ីនធឺណេត។
កងបញ្ជាការទាហាន Cyber ត្រូវបានបង្កើតឡើងដើម្បធ្វើការប្រយុទ្ធ និង ធ្វើការរួមគ្នាលើបណ្តាញអ៊ិនធឺណេតរបស់យោធា និង ប៉ូលិស Cyber ក៏ដូចជាអង្គភាពសន្តិសុខផ្សេងទៀត។ កងបញ្ជាការនេះបានអះអាងថាខ្លួនធ្វើការរាល់ថ្ងៃទាក់ទងនឹងជម្លោះព្រំដែន ហើយក៏ជួយប្រទេសបានយ៉ាងច្រើន ហើយថែមទាំងអះអាងទៀតថា រាល់ថ្ងៃនេះប្រទេសថៃ និង ជនស៊ីវិលក្នុងប្រទេសត្រូវបានគេវាយប្រហារច្រើនណាស់តាមរយៈអ៊ិនធឺណេត។ ខ្លួនគឺជាអង្គភាពមួយដ៏សំខាន់សម្រាប់ប្រទេស ទាំងក្នុង និង ក្រៅវិស័យយោធា។
ថវិកាទាំង ៩៧ លានបាតនេះ នឹងយកទៅប្រើប្រាស់សម្រាប់ការពារវេបសាយដែលងាយនឹងរងគ្រោះបំផុត បើមានប្រព័ន្ធណាមួយត្រូវបានវាយប្រហារ នោះកងបញ្ជាការយោធានឹងចូលទៅដោះស្រាយឱ្យភ្លាមៗ រួចនឹងប្រមូលភស្តុតាង ស្វែងរកអ្នកវាយប្រហារ ហើយនឹងបញ្ជូនទៅប៉ូលិស ដើម្បីចាប់ខ្លួនមកផ្តន្ទាទោសតាមផ្លូវច្បាប់។
លោក Chatchai Chaikasem បានបញ្ជាក់ផងដែរថា ថវិកានេះមិនត្រូវបានប្រើប្រាស់សម្រាប់ IO ទេ ដោយសារអ្នកប្រយុទ្ធគឺជាវិស្វករ អ្នកសរសេរកម្មវិធី និង អ្នកជំនាញសន្តិសុខ OT ។ ចំណែក IO គឺជាការបង្កើត ដែលធ្វើឱ្យកើតភាគីប្រទេសថៃ ភាគីប្រឆាំង ភាគីកណ្តាល ជាពិសេសអ្នកដែលមានអំណាចសម្រេចចិត្តលើបញ្ហា កើតអារម្មណ៍អ្វីមួយ ហើយរឿងនេះសូម្បីតែសិស្សវិទ្យាល័យក៏ធ្វើបានដែរ ដូច្នេះគ្រប់គ្នាគួរតែមានមោទនភាពដែលប្រទេសថៃមានអង្គភាពនេះ៕
ប្រភព៖ PPTVHD36
