នាពេលថ្មីៗនេះ រដ្ឋបាលរាជធានីភ្នំពេញ បានចេញសេចក្តីជូនដំណឹង ស្តីពីការដង្ហែសព ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការ ក្រសួងសាធារណការ និង ដឹកជញ្ជូន ដែលគ្រួសារសពបានរៀបចំពិធីតម្កល់សព និង ធ្វើបុណ្យទក្ខិណានុប្បទានតាមប្រពៃណី នៅគេហដ្ឋានលេខ ១៧ ផ្លូវលេខ ៣៣៥ ភូមិ ២ សង្កាត់បឹងកក់ទី ២ ខណ្ឌទួលគោក រាជធានីភ្នំពេញ។
លុះដល់ព្រឹកថ្ងៃទី ០២ ខែមេសា ឆ្នាំ ២០២៥ វេលាម៉ោង ០៧:១១នាទី នឹងរៀបចំពិធីដង្ហែសពឆ្ពោះទៅកាន់វត្តច័ន្ទបុរីវង្ស ដោយហែចេញពីគេហដ្ឋាន បត់ស្តាំតាមផ្លូវលេខ ៥៩២ បត់ស្តាំតាមផ្លូវលេខ ៥៩៨ រហូតដល់ស្តុបកាំកូស៊ីធី បត់ឆ្វេងតាមមហាវិថីអង្គរភ្នំពេញ បត់ស្តាំតាមមហាវិថីឈ្នះឈ្នះ បត់ឆ្វេងតាមផ្លូវជាតិលេខ ៥ រហូតដល់ទីតាំងប្រារព្ធពិធីបុណ្យបញ្ចុះសពតាមប្រពៃណីនៅវត្តច័ន្ទបុរីវង្ស ស្ថិតនៅភូមិសំរោងជើង សង្កាត់សំរោង ខណ្ឌព្រែកព្នៅ រាជធានីភ្នំពេញ។
ដើម្បីឱ្យការរៀបចំពិធីដង្ហែសពខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និង របៀបរៀបរយសាធារណៈ អាជ្ញាធរមានសមត្ថកិច្ច នឹងធ្វើការរៀបចំសម្រួលចរាចរណ៍នៅតាមតម្រាយផ្លូវដង្ហែសពជាបណ្តោះអាសន្ន ដោយស្នើសុំបងប្អូនប្រជាពលរដ្ឋទាំងអស់ ដែលត្រូវធ្វើដំណើរឆ្លងកាត់ តាមតម្រាយផ្លូវខាងលើ មេត្តាយោគយល់អធ្យាស្រ័យ និង ធ្វើការពង្វាងចរាចរណ៍ដោយក្ដីអនុគ្រោះ៕
សូមអានសេចក្ដីលម្អិតនៅខាងក្រោម ៖
