មហាជននិយមតាមដានភាពយន្តពីមុនៗ ច្បាស់ជានៅចងចាំនៅឡើយ ពីតារាភាពយន្តជើងចាស់ អ្នកនាង អម្ពរ ទេវី និង អ្នកនាង នារីរ័ត្ន គន្ធា ដែលមានភាពល្បីល្បាញក្នុងជំនាន់រួមគ្នា។ លើសពីនោះ បច្ចុប្បន្ន តារាភាពយន្តជើងចាស់ទាំង ២ រូប ក៏បានទៅរស់នៅសហរដ្ឋអាមេរិកដូចគ្នាដែរ។
យ៉ាងណាមិញកាលពីពេលថ្មីៗនេះ អ្នកនាង អម្ពរ ទេវី មានឱកាសជួបគ្នាញុំាអាហារនឹងមិត្តចាស់ គឺអ្នកនាង នារីរ័ត្ន គន្ធា និង បានបង្ហោះសារថា៖ «ខ្ញុំមានសេចក្ដីរីករាយណាស់ថ្ងៃនេះ ដែលបានអញ្ជើញសម្លាញ់ នារីរ័ត្ន គន្ធា មកទទួលទានអាហារពេលល្ងាចជាមួយគ្នា។ សូមស្វាគមន៍សម្លាញ់ ដែលបានអញ្ជើញមកធ្វើបុណ្យបញ្ជុះខណ្ឌសីមា វត្តខេមរពោធិរាម រដ្ឋ Washington State»។
ដោយឡែក ក្រឡេកទៅមើលអ្នកនាង នារីរ័ត្ន គន្ធា ឯណោះវិញ ក៏មិនភ្លេចបង្ហាញអារម្មណ៍ក្រោយពីបានជួបមិត្តរួមជំនាន់ដែរ ដោយអ្នកនាង នារីរ័ត្ន គន្ធា បានបង្ហោះសារឆ្លើយតបទៅកាន់អ្នកនាង អម្ពរ ទេវី ថា៖ «នាងខ្ញុំ សែនសប្បាយចិត្តយ៉ាងខ្លាំង ដែលបានមកជួបសម្លាញ់ អម្ពរ ទេវី ហើយខ្ញុំក៏សូមអរគុណសម្លាញ់ ព្រមទាំងស្វាមី ដែលខំចំណាយពេលវេលាដ៏មានតម្លៃ ដើម្បីមកជួបគ្នា និង រំឭកនូវអនុស្សាវរីយ៍ល្អៗ ដែលពួកយើងធ្លាប់មានកាលគ្រាកន្លង និង ពិសាអាហារយ៉ាងមានឱជារស។ ខ្ញុំមានអារម្មណ៍កក់ក្តៅខ្លាំងណាស់សម្លាញ់ រយៈពេលជាងសាមសិបឆ្នាំហើយ មិត្តភាពពួកយើងមិនដែលប្រែប្រួលឡើយ។ អរគុណពេលវេលា ដែលបានឱ្យយើងជួបគ្នា។ ដោយសេចក្តីនឹករឭកពីចម្ងាយ មិត្តសម្លាញ់ជានិរន្ត»៕
