បើទោះជាកម្មវិធីមង្គលការរបស់តារាចម្រៀងរ៉េបប្រុសស្រី ទេព បូព្រឹក្ស និង ជី ដេវីត បានបញ្ចប់ទៅដោយភាពសប្បាយរីករាយទៅហើយក្តី ប៉ុន្តែការសរសើរ និង ចែករំលែកនូវសកម្មភាពនានាក្នុងថ្ងៃពិសេសរបស់អ្នកទាំង ២ នៅតែចែកចាយពាសពេញបណ្តាញសង្គមនានា។
ជាការពិតណាស់ ពិធីមង្គលការរបស់ អ្នកនាង ទេព បូព្រឹក្ស និង លោក ជី ដេវីត បានរៀបចំយ៉ាងអធឹមអធម ដោយអញ្ជើញភ្ញៀវកិត្តិយសមានតួនាទីខ្ពស់ក្នុងសង្គម និង តារាប្រុសស្រីគ្រប់ជំនាន់មកចូលរួម។ ក្នុងនោះ គេសង្កេតឃើញថា ក៏មានតារាប្រុសស្រី ដែលមិនសូវបង្ហាញវត្តមានលើវិថីសិល្បៈ ក៏មានវត្តមានក្នុងពិធីមង្គលជ័យនេះដែរ។
ជាក់ស្តែង ក្នុងនោះក៏មានវត្តមានរបស់ កញ្ញា ថាច ម៉ារី ដែលជាតារាចម្រៀង និង តារាសម្តែងដ៏មានប្រជាប្រិយភាពមួយរូបដូចគ្នាដែរ ខណៈមួយរយៈក្រោយនេះ កញ្ញាក៏ហាក់រយាលពីការងារសិល្បៈមិនសូវបង្ហាញវត្តមានក្នុងសកម្មភាពនានារបស់អ្នកសិល្បៈឡើយ។
យ៉ាងណាមិញ ក្នុងការចូលរួមពិធីមង្គលការរបស់អ្នកនាង ទេព បូព្រឹក្ស និង លោក ជី ដេវីត ក៏បានធ្វើឱ្យកញ្ញា ថាច ម៉ារី ហួសចិត្តនឹងការបញ្ចេញមតិរបស់បុគ្គលមួយរូប ដែលបានខមមិននៅក្នុងការ Live អំឡុងពេលកម្មវិធីរបស់គូស្វាមីភរិយាខាងលើថា៖ «បងស្រីឈុតខ្មៅ អត់មានពាក់គ្រឿងអីតិច»។ ខមមិននេះដែរ បានធ្វើឱ្យកញ្ញា ថាច ម៉ារី មិនសប្បាយចិត្ត និង បញ្ចេញពាក្យពីក្នុងចិត្តថា៖ «ចឹងក៏ bully យើងបានដែរ»៕
