យុវជនរូបនេះ ក្តោបតំណែងពិធីករបើកកម្មវិធី មហោស្រពភាពយន្តអន្តរជាតិកម្ពុជា ដល់ទៅ ៤ ឆ្នាំជាប់គ្នា ជាអតីតនិស្សិតនៅសកលវិទ្យាល័យភូមិន្ទភ្នំពេញ

មហាជនតាមដានពីកម្មវិធីមហោស្រពភាពយន្តអន្តរជាតិកម្ពុជា ច្បាស់ជាបានជ្រាបហើយថា នៅឆ្នាំ ២០២៥ នេះ មហោស្រពភាពយន្តអន្តរជាតិកម្ពុជា បានឈានមកដល់លើកទី ១៤ ហើយ។

ក្នុងនោះ ពិធីបើកជាផ្លូវការ និង ដំណើរការនៃ មហោស្រពភាពយន្តអន្តរជាតិកម្ពុជា លើកទី ១៤ ក៏បាន និង កំពុងដំណើរការហើយ ចាប់ពីថ្ងៃទី ២១ ដល់ ថ្ងៃទី ២៩ ខែមីនា ឆ្នាំ ២០២៥ ដោយមានស្នាដៃធំៗជាច្រើនរបស់ផលិតករក្នុង និង ក្រៅស្រុកបានដាក់បញ្ចាំងជាផ្លូវការ។ លើសពីនោះ មហាជនក៏មានឱកាសបានជួបនឹង សិល្បករ សិល្បការិនី ក៏ដូចជាផលិតករល្បីៗទាំងជាតិ និង អន្តរជាតិថែមទៀតផង។

យ៉ាងណាមិញ ទន្ទឹមមហោស្រពភាពយន្តអន្តរជាតិកម្ពុជា លើកទី ១៤ មហាជនក៏បានចាប់អារម្មណ៍នឹងពិធីករនៃមហោស្រពខាងលើ ដែលបានក្តោបតំណែងចំនួន ៤ ឆ្នាំ ជាប់គ្នាមកហើយ បើគិតចាប់ពី មហោស្រពភាពយន្តអន្តរជាតិកម្ពុជា លើកទី ១១ ដល់ទី ១៤ នេះ។

ជាក់ស្តែង ពិធីករនៃការបើកនៃ មហោស្រពភាពយន្តអន្តរជាតិកម្ពុជា ៤ ឆ្នាំ ចុងក្រោយនេះ ត្រូវបានគេស្គាល់ថាជាយុវជនឆ្នើមមួយរូបមានឈ្មោះថា រៀម ចំរើន ដែលជាផលិតករ កម្មវិធីឯករាជ្យមួយរូប។ លើសពីនោះ យុវជនរូបនេះ គឺជានិស្សិតបញ្ចប់ការសិក្សានៅឯសកលវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និង សារគមនាគមន៍ (DMC) និង ជាអ្នកសារព័ត៌មានមួយរូបដែរ។

អ្វីដែលគួរឱ្យចាប់អារម្មណ៍ទៀតនោះ មហាជនធ្លាប់បានទស្សនាការប្រកួតកម្មវិធី The Rapper Cambodia រដូវកាលទី ១ តាំងពីការប្រកួតដំបូង រហូតដល់វគ្គពាក់កណ្តាលផ្តាច់ព្រ័ត្រក៏ធ្លាប់បានឮសំឡេងរបស់លោក VO ក្នុងកម្មវិធីប្រកួតចម្រៀងរ៉េបខាងលើដែរ៕

រូបភាព៖ បុប្ឋាណា