ជារឿងដ៏មានមោទកភាពយ៉ាងខ្លាំង សម្រាប់វិស័យតន្ត្រី និង សិល្បករ សិល្បការិនីរបស់ប្រទេសកម្ពុជា ដោយនៅខែកក្កដា ឆ្នាំ ២០២៥ ខាងមុខនេះ តារាចម្រៀងប្រុសស្រីជាច្រើននឹងបង្ហាញវត្តមានលើឆាកតន្ត្រីអន្តរជាតិ Sabaidee Fest នៅឯសហរដ្ឋអាមេរិក។
ក្នុងនោះដែរ តារាចម្រៀងកម្ពុជា ដែលនឹងទៅចូលរួមការសម្តែងលើឆាកតន្ត្រីអន្តរជាតិ Sabaidee Fest រួមមានតារាចម្រៀងប្រចាំផលិតកម្មបារមី លោក វណ្ណដា, លោក វណ្ណថាន, លោក នរិទ្ធ, លោក យូហៃ និង កញ្ញា រ៉េត ស៊ូហ្សាណា។ មិនត្រឹមតែប៉ុណ្ណោះ ក៏មានការចូលរួមពីតារាចម្រៀងប្រចាំផលិតកម្ម KlabYahandz លោក វុទ្ធា ផងដែរ។
បើនិយាយពីលោក វុទ្ធា ឯណោះវិញ នេះមិនមែនជាលើកទី ១ នោះទេ ដែលលោកមានវត្តមានក្នុងការសម្តែងនៅក្រៅប្រទេស តែនេះជាលើកដំបូងនៃការបង្ហាញវត្តមានក្នុងកម្មវិធី Sabaidee Fest នេះ។ ម្យ៉ាងវិញទៀត អ្វីដែលកាន់តែពិសេសទៀតនោះ លោក វុទ្ធា បានក្តោបឱកាសចូលរួមសម្តែងក្នុងការប្រគំតន្ត្រីទេសចរណ៍ «US Concert Tour» របស់ Sabaidee Fest ដល់ទៅ ៤ រដ្ឋ ឯណោះ៕
