កាលពីយប់ថ្ងៃទី ៥ ខែសីហា ឆ្នាំ ២០២៥ កន្លងទៅនេះ មានករណីអគ្គិភ័យ បានឆាបឆេះសណ្ឋាគារចំណាស់មួយនៅក្នុងប្រទេសថៃ ដែលធ្វើឱ្យប្រជាជននៅក្នុងតំបន់មានការសោកស្តាយជាខ្លាំង។
តាមព័ត៌មានបានឱ្យដឹងថា សណ្ឋាគារនេះ មានឈ្មោះថា Yinguan ជាសណ្ឋាគារដ៏ល្បី និង ចំណាស់មួយប្រចាំខេត្តស្រះបុរី ដែលមានកម្ពស់ ២ ជាន់ ធ្វើឡើងពីឈើពាក់កណ្តាល និង បេតុងពាក់កណ្តាល។ តាមការឱ្យដឹង ភ្លើងបានចាប់ផ្តើមឆាបឆេះពីបន្ទប់ទឹកជាន់ក្រោមក្នុងបន្ទប់លេខ ៨ រួចក៏រាលដាលទៅកាន់តួសណ្ឋាគារទាំងមូលយ៉ាងលឿន។ ក្នុងនោះ គេប្រើឡានពន្លត់អគ្គិភ័យចំនួន ១០ គ្រឿង និង ប្រើពេលជាង ១ ម៉ោង ទើបអាចពន្លត់បានទាំងស្រុង។
យ៉ាងណាមិញ មានស្រ្តីម្នាក់បានរងរបួសដោយសារការឆក់ចរន្តអគ្គិសនី ប៉ុន្តែមិនមានអ្នកស្លាប់នោះទេ ដោយឡែកអគារសណ្ឋាគារត្រូវរងការខូចខាតស្ទើរទាំងអស់ ហើយហាងនៅជាប់នោះក៏ទទួលផលប៉ះពាល់ដូចគ្នា។ ពេលនេះមន្រ្តីជំនាញកំពុងស៊ើបអង្កេតរកមូលហេតុនៃការឆេះ និង វាយតម្លៃចំពោះការខូចខាត៕
ប្រភព៖ Khaosod
