នៅព្រឹកថ្ងៃទី ២៩ ខែសីហា ឆ្នាំ ២០២៥ នេះ គឺជាព្រឹកថ្ងៃទី ២ ក៏ដូចជាថ្ងៃបង្ហើយ នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥។
ក្នុងថ្ងៃបង្ហើយនេះ អង្គភាពប្រឆាំងអំពើពុករលួយ បានជូនដំណឹងអំពីស្ថានភាពនៅមណ្ឌលវិទ្យាល័យ ១០មករា ១៩៧៩ ជើង ស្ថិតក្នុងខេត្តសៀមរាប ដែលនៅវេលាម៉ោង ៧៖៣០ នាទីព្រឹកនេះ មានបេក្ខជនឈ្មោះ ដូង ពនេអព្យា ភេទប្រុស បន្ទប់លេខ 29 លេខតុ 714 បានបញ្ជូនតាមរថយន្តសង្គ្រោះ មកមណ្ឌលប្រឡងក្នុងស្ថានភាពធ្ងន់ធ្ងរបាត់បង់ស្មារតី។ តាមការផ្ដល់ព័ត៌មានពីអាណាព្យាបាលបានឱ្យដឹងថា កាលពីយប់ថ្ងៃទី ២៨ សីហា បេក្ខជន ដូង ពនេអព្យា បានដួលប៉ះទង្គិចក្បាលនៅកន្លែងស្នាក់នៅ ហើយបានចូលសម្រាកនៅមន្ទីរពេទ្យឯកជនមួយនៅក្នុងខេត្តសៀមរាប។
ACU បានឱ្យដឹងទៀតថា លុះព្រឹកឡើង អាណាព្យាបាលក៏បានទាក់ទងមកមណ្ឌលសុំការអនុញ្ញាតដើម្បីឱ្យបេក្ខជនចូលប្រឡង តែក្រោយពីបញ្ជូនមកមណ្ឌលប្រឡងគ្រូពេទ្យប្រចាំមណ្ឌលបានពិនិត្យឃើញថា បេក្ខជនមិនអាចប្រឡងបានទេ ហើយត្រូវបានបញ្ជូនទៅមន្ទីរពេទ្យបង្អែកខេត្តសៀមរាប ដើម្បីបន្តការព្យាបាល៕
