កាលពីម៉ោង ១ អធ្រាត្រ ឈានចូលថ្ងៃទី ១៣ ខែកញ្ញា ឆ្នាំ ២០២៥ កន្លងទៅនេះ នៅទីក្រុងបាងកក ប្រទេសថៃ មានករណីឆេះផ្សារមួយកន្លែង ដែលបង្កឱ្យមានការចលាចលទាំងកណ្តាលយប់។
តាមព័ត៌មានបានឱ្យដឹងថា ផ្សារខាងលើនេះមានឈ្មោះថាផ្សារផាហ៊ូរ៉ាត់ ស្ថិតនៅក្នុងសង្កាត់បូរ៉ាក់ផាភិរម្យ ខណ្ឌផ្រាក់ណាខន ទីក្រុងបាងកក។ អគ្គិភ័យបានចាប់ផ្តើមឆាបឆេះពីអគារ ៣ ជាន់មួយនៅក្នុងផ្សារនេះ ដែលជាកន្លែងលក់ខោអាវ និងគ្រឿងអលង្ការ ដែលធ្វើឱ្យអ្នកដែលស្នាក់នៅក្នុងអគារនោះមានការភិតភ័យជាខ្លាំង។
យ៉ាងណាមិញ អាជ្ញាធរប្រចាំតំបន់បានចុះទៅអន្តរាគមន៍ ដោយពន្លត់ភ្លើងអស់រយៈពេល ២០ នាទីទើបបានសម្រេច ហើយក្នុងនោះមិនមាននរណាម្នាក់រងរបួសឡើយ ដោយអាជ្ញាធរបានជួយជម្លៀសជនរងគ្រោះចេញមកមានសុវត្ថិភាពទាំងអស់ ចំណែកឯមូលហេតុនៃការឆេះវិញ ត្រូវបានគេសន្និដ្ឋានថាមកពីការទុសេខ្សែភ្លើង៕
ប្រភព៖ Khaosod
