យប់មិញ! ក្រុមតារាចម្រៀងកូរ៉េ NCHIVE ត្រលប់ទៅកូរ៉េវិញទាំងស្នាមញញឹម និង កក់ក្ដៅ ក្រោយស្នាក់នៅកម្ពុជាបំពេញបេសកកម្មជាង ២០ ថ្ងៃ

កាលពីចុងខែកក្កដា ឆ្នាំ ២០២៥ កន្លងទៅនេះ អ្នកគាំទ្រវិស័យចម្រៀង K-Pop នៅកម្ពុជា ច្បាស់ជាបានជ្រាបមកហើយ ពីក្រុមចម្រៀង K-Pop ផ្នែកបុរស NCHIVE ដែលបានធ្វើដំណើរមកកាន់ប្រទេសកម្ពុជាកាលពីថ្ងៃទី ២៩ ខែកក្កដា ឆ្នាំ ២០២៥ កន្លងទៅ។

ក្នុងការអញ្ជើញមករបស់ក្រុមចម្រៀង K-Pop ផ្នែកបុរស NCHIVE នេះ គឺជាកម្មវិធី «NCHIVE Promotion Cambodia Tour» ដែលនឹងប្រព្រឹត្តទៅចាប់ពីថ្ងៃទី ២៩ ខែកក្កដា ដល់ថ្ងៃទី ១៩ ខែសីហា ឆ្នាំ ២០២៥ ដោយបានរៀបចំដោយផលិតកម្ម K’VE Entertainment ផងដែរ។

កម្មវិធី «NCHIVE Promotion Cambodia Tour» របស់ក្រុមចម្រៀង K-Pop ផ្នែកបុរស NCHIVE បានចប់សព្វគ្រប់រួចជាស្រេចហើយ ដោយនៅយប់ថ្ងៃទី ១៩ ខែសីហា ឆ្នាំ ២០២៥ កន្លងទៅនេះ សមាជិកទាំង ៦ រូប ក៏បានវិលត្រឡប់ទៅកាន់ប្រទេសកូរ៉េខាងត្បូងវិញហើយដែរ។ ក្នុងការវិលត្រឡប់របស់ក្រុមចម្រៀង K-Pop ជំនាន់ថ្មីនេះ ក៏មានការជូនដំណើរពីសំណាក់អ្នកគាំទ្រកម្ពុជាជាច្រើននៅឯព្រលានយន្តហោះទៀតផង។

ជាការពិតណាស់ ងាកទៅកាន់បេសកកម្មរយៈពេលជាង ២០ ថ្ងៃ កន្លងទៅ នៅលើទឹកដីកម្ពុជានេះ បានបង្កើតនូវការចងចាំយ៉ាងពិសេសចំពោះក្រុម NCHIVE ជាមួយនឹងអ្នកគាំទ្រកម្ពុជា ដោយមិនត្រឹមតែជាការផ្សារភ្ជាប់លើវិស័យតន្ត្រីនោះទេ ពោលគឺ ក្រុមចម្រៀង K-Pop នេះ ក៏បានបង្ហាញអន្តរជាតិពីប្រទេសកម្ពុជាជាច្រើនក្នុងសកម្មភាពរបស់ពួកគេទៅតាមតំបន់មួយចំនួនក្នុងប្រទេសកម្ពុជា។ ក្នុងនោះដែរ ក្រុមអ្នកគាំទ្ររបស់ NCHIVE នៅកម្ពុជា ត្រូវបានដាក់ឈ្មោះថា «Cam Save» ដែលជាឈ្មោះដ៏មានអត្ថន័យទៀតផង៕