នៅថ្ងៃទី ២០ ខែតុលា ឆ្នាំ ២០២៥ នេះ មានការរាយការណ៍ពីករណីយន្តហោះមួយគ្រឿង បានរអិលធ្លាក់ផ្លូវខណៈចុះចតនៅទីក្រុងហុងកុង ហើយជ្រុលធ្លាក់ចូលទឹកសមុទ្រ បណ្តាលឱ្យស្លាប់មនុស្សអស់ ២ នាក់។
តាមព័ត៌មានបានឱ្យដឹងថា ហេតុការណ៍បានកើតឡើងនៅម៉ោងប្រមាណ ៣ និង ៥៣ ព្រឹក នៅថ្ងៃទី ២០ ខែតុលា ឆ្នាំ ២០២៥ នេះ ដោយយន្តហោះខាងលើនេះគឺជា យន្តហោះ Boeing 747 ជាយន្តហោះដឹកអីវ៉ាន់របស់ក្រុមអាកាសចរណ៍ Air ACT ដែលបានធ្វើដំណើរចេញពីទីក្រុងឌូបៃ មកកាន់ទីក្រុងហុងកុង។ ខណៈកំពុងចតនៅព្រលានយន្តហោះទីក្រុងហុង យន្តហោះនេះ ក៏ស្រាប់តែរអិលធ្លាក់ចេញពីផ្លូវមកខាងឆ្វេង ហើយក៏បានជ្រុលធ្លាក់ចូលទៅក្នុងទឹកសមុទ្រដែលនៅក្បែរនោះ។
យ៉ាងណាមិញ តាមព័ត៌មានបានឱ្យដឹងថា យន្តហោះខាងលើនេះ ក៏បានជ្រុលទៅបុកឡានរបស់បុគ្គលិកព្រលានយន្តហោះ បណ្តាលឱ្យធ្លាក់ចូលទៅក្នុងទឹកសមុទ្រជាមួយគ្នា ដោយបង្កឱ្យបុគ្គលិក ២ នាក់ដែលនៅក្នុងឡានបានបាត់បង់ជីវិត។ ចំណែកអ្នកនៅលើយន្តហោះទាំង ៤ នាក់ មិនមានរងរបួសអ្វីនោះទេ ហើយពេលនេះអាជ្ញាធរកំពុងសហការគ្នាត្រួតពិនិត្យកន្លែងកើតហេតុជាបន្តទៀត៕
ប្រភព៖ TOI
