រយៈពេលជាង ១ សប្តាហ៍មកហើយ បើគិតចាប់តាំងពីថ្ងៃចាកចេញពីប្រទេសកម្ពុជា កាលពីថ្ងៃទី ០២ ខែវិច្ឆិកា ឆ្នាំ ២០២៥ ដែលអ្នកនាង ថៃ នារីសុជាតា Miss Universe Cambodia 2025 បានតំណាងឱ្យកម្ពុជាទៅចូលរួមការប្រកួត Miss Universe លើកទី ៧៤។
ក្នុងនោះដែរ វត្តមាននៃការតំណាងឱ្យកម្ពុជានោះ Queen រូបនេះ ពិតជាមិនធ្វើឱ្យអ្នកគាំទ្រខកបំណងនោះឡើយ ពោលគឺ បវរកញ្ញាកម្ពុជារូបនេះ បានធ្វើឱ្យអ្នកគាំទ្រទាំងជាតិ និង អន្តរជាតិស្រែកវ៉ាវ ពីសម្រស់ សមត្ថភាពរបស់នាងអំឡុងពេលបង្ហាញវត្តមានរាល់គ្រប់កម្មវិធីនានា ដែល MUO បានរៀបចំ។ លើសពីនោះ ក៏មានសារព័ត៌មានអន្តរជាតិជាច្រើន បានចុះផ្សាយពីភាពលេចធ្លោ និង សក្តានុពលរបស់ Miss Universe Cambodia 2025 ថៃ នារីសុជាតា ផងដែរ។
យ៉ាងណាមិញ ងាកមកកាន់អ្នកម្តាយរបស់ អ្នកនាង ថៃ នារីសុជាតា គឺលោកស្រី ងិន ម៉ានីយ៉ា ឯណោះវិញ បើទោះជាពេលនេះ មិនបាននៅក្បែរកូនស្រីក៏ពិតមែន ប៉ុន្តែលោកស្រីបានបង្ហាញការគាំទ្រ និង ផ្តល់កម្លាំងចិត្តគ្រប់រូបភាពសម្រាប់កូនស្រីពៅ ដែលកំពុងស្ថិតនៅកងប្រកួតនាប្រទេសថៃ។ ក្នុងនោះ លោកស្រី ងិន ម៉ានីយ៉ា ក៏តែងតែបង្ហោះពីដំណឹងផ្សេងៗពាក់ព័ន្ធពីកូនស្រី និង ការប្រកួតសម្រាប់អ្នកគាំទ្រទៀតផង។
ជាក់ស្តែង កាលពីថ្ងៃទី ០៩ ខែវិច្ឆិកា ឆ្នាំ ២០២៥ កន្លងទៅ លោកស្រី ងិន ម៉ានីយ៉ា បានបង្ហោះសារជម្រាបពីដំណឹងពាក់ព័ន្ធនឹងផេកផ្លូវការ Miss Universe Cambodia ដែលមិនបានបង្ហោះពីសកម្មភាពនានារបស់ Miss Universe Cambodia 2025 ក៏ព្រោះហេតុផលមួយចំនួន។
លោកស្រី ងិន ម៉ានីយ៉ា បានរៀបរាប់ថា៖ «បងប្អូនសូមកុំខឹង page Miss Universe Cambodia អី ខ្ញុំឧទាហរណ៍អ៊ីចេះ ដើម្បីឱ្យបងប្អូនងាយយល់។ ម៉ែឪលះលែងគ្នា នៅចំពេលដែលកូនចេញទៅប្រឡង។ ហើយម៉ែប្ដឹងទាមទារសិទ្ធិគ្រប់គ្រងកូន ហើយឪអ្នកកាន់ផេកអត់មានសិទ្ធិផុសអ្វីពីកូនទៀតទេ។ ហេតុនេះហើយទើបស្ងាត់ សូមបងប្អូនជ្រាបជាព័ត៌មាន និង សូមផ្ដល់ភាពស្ងប់ស្ងាត់ ដើម្បីជាកម្លាំងចិត្តដល់កូនស្រីកំព្រាដែលទៅប្រឡងស្រុកគេ។ ហេតុនេះហើយ មានតែពួកយើងទាំងអស់គ្នាជួយបោះឆ្នោតឱ្យនាងទេ ទើបនាងបានដើរទៅមុខទៀតវែងឆ្ងាយ»៕
