ជារឿងដ៏គួរឱ្យសោកស្ដាយ និង នឹកស្មានមិនដល់ ក្មេងស្រីដែលមានអាយុទើបតែ ៦ ឆ្នាំម្នាក់ ត្រូវបានជនល្មោភកាមមិនស្គាល់មុខម្នាក់ បានចាប់ច្របាច់កគំរាមសម្លាប់ រួចអូសយកទៅចាប់រំលោភ បណ្ដាលឱ្យក្មេងស្រីរងរបួសប្រដាប់ភេទជាទម្ងន់ កំពុងតែសង្គ្រោះនៅឯមន្ទីរពេទ្យគន្ធបុប្ផា កាលពីវេលាម៉ោង ៤ ល្ងាច ថ្ងៃទី ២១ ខែមីនា ឆ្នាំ ២០២៥ កន្លងទៅ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
គិតត្រឹមពេលនេះ គឺមានរយៈពេល ៣ ថ្ងៃហើយដែលក្មេងស្រីរងគ្រោះ កំពុងដេកសម្រាកព្យាបាលរបួសនៅមន្ទីរពេទ្យគន្ធបុប្ផា ក្រោយរងគ្រោះពីសំណាក់ជនល្មោភកាមមិនស្គាល់មុខ ខណៈម្ដាយក្មេងស្រីរងគ្រោះ បានត្រឹមតែលើកដៃសំពះសូមឱ្យអ្នកសារព័ត៌មានជួយផ្សព្វផ្សាយដើម្បីស្វែងរកយុត្តិធម៌ដល់កូនស្រី។
ក្នុងនោះ គេសង្កេតឃើញមហាជនជាច្រើនបាននាំគ្នាចែករំលែកបន្តគ្នាព្រោងព្រាត ដើម្បីជួយរកយុត្តិធម៌ដល់ក្រុមគ្រួសារជនរងគ្រោះ ខណៈម្ដាយក្មេងស្រីរងគ្រោះ ក៏បានសំណូមពរទៅកាន់សមត្ថកិច្ច មេត្តាជួយស្វែងរកមុខជនល្មើស ដើម្បីយកមកធ្វើការផ្ដន្ទាទោសតាមផ្លូវច្បាប់ចំពោះទង្វើដ៏អាក្រក់មួយនេះ៕
ប្រភព ៖ សុវណ្ណ រិទ្ធី
