នៅថ្ងៃទី ២២ ខែកុម្ភៈ ឆ្នាំ ២០២៥ នេះ មានគណនីហ្វេសប៊ុកបុរសម្នាក់បានបង្ហោះសារស្នើសុំយុត្តិធម៌ ជុំវិញករណីគ្រោះថ្នាក់ចរាចរណ៍មួយដោយរូបលោកគឺជាជនរងគ្រោះក្នុងហេតុការណ៍នោះ។ ម្ចាស់គណនីហ្វេសប៊ុករូបនេះបានបញ្ជាក់ថា តាំងពីលោកជួបគ្រោះថ្នាក់ រហូតដល់ការព្យាបាលជាសះស្បើយមកដល់ពេលនេះ គឺនៅតែដោះស្រាយរឿងហេតុមិនទាន់ចេញនៅឡើយ។
បើតាមការឱ្យដឹងពីម្ចាស់គណនីហ្វេសប៊ុកឈ្មោះ Pichkola Ang ដែលអះអាងជាជនរងគ្រោះ បានបង្ហោះសាររៀបរាប់នៅថ្ងៃទី ២២ ខែកុម្ភៈ ឆ្នាំ ២០២៥ នេះ ឱ្យបានដឹងថា ៖ «សូមបងប្អូនជួយគិតពិចារណារឿងដ៏អយុត្តិធម៌ ជនបង្កមិនព្រមសងសំណងតាមហេតុការណ៍ដែលគាត់បានបង្កសោះ មិនមានការទទួលខុសត្រូវ ហើយការដោះស្រាយនៅខណ្ឌពោធិ៍សែនជ័យ យូរទៅកាន់តែយូរដោយសារគ្មានការយល់ពីគ្នាជាជនរងគ្រោះសោះ ខាងខ្ញុំបាទដេកពេទ្យពីរនាក់មើលតាំងពីឈឺរហូតដល់មើលខ្លួនជា ហើយនៅតែរឿងដោះស្រាយមិនចេញ»។
តាមប្រភពពីម្ចាស់គណនីខាងលើបានបន្តបញ្ជាក់ថា គ្រោះថ្នាក់នោះបានកើតឡើងតាំងពីថ្ងៃទី ៧ ខែមករា ឆ្នាំ ២០២៥ កន្លងទៅ ដោយលោកបានជួបប្រទះគ្រោះថ្នាក់ចរាចរណ៍មួយនេះ បង្កដោយសាររថយន្តមួយពាក់ស្លាកលេខ កំពង់ឆ្នាំង 2C-4456 បានបើកបត់បញ្រ្ចាសខ្វះការប្រុងប្រយ័ត្ន (មិនមើលផ្លូវអាទិភាព) បណ្ដាលឱ្យលោកដែលជាអ្នកធ្វើដំណើរផ្លូវត្រង់មានគ្រោះថ្នាក់ភ្លាមៗ បន្ទាប់មកទើបសមត្ថកិច្ចនៅអធិការខណ្ឌពោធិ៍សែនជ័យ ទទួលផែនចរាចរណ៍ផ្លូវគោកបានវាស់វែង និង ដោះស្រាយជាមួយភាគី។
ក្នុងនោះម្ចាស់គណនីដែលជាជនរងគ្រោះបានឱ្យដឹងទៀតថា ៖ «ការដោះស្រាយជាមួយគូភាគី ៥-៦ លើក ដោយភាគីខាងរថយន្តសងសំណងត្រឹម ៤០០$ ដែលជាសំណងមួយពុំអាចទទួលយកបាន ចំណែកប៉ូលិសតែងតែនិយាយកាន់ជើងភាគីរថយន្តរហូត ទើបខ្ញុំស្នើឱ្យសមត្ថកិច្ចបញ្ជូនសំណុំរឿងទៅតុលាការ។ ប៉ុន្តែអស់រយៈពេលជាយូរហើយអធិការខណ្ឌពោធិ៍សែនជ័យ មិនបញ្ជូនទៅតុលាការទេ បែរជាបញ្ជូនទៅស្នងការក្រុងភ្នំពេញទៅវិញ។ តើការបញ្ជូនសំណុំរឿងទៅស្នងការ មិនព្រមបញ្ជូនសំណុំរឿងទៅតុលាការនេះត្រូវនិតិវិធីច្បាប់ដែរ ឬ ទេ?»៕
