នៅថ្ងៃទី ០២ ខែកញ្ញា ឆ្នាំ ២០២៥ នេះ រដ្ឋបាលខណ្ឌដូនពេញ បានជូនដំណឹងឱ្យបានដឹងថា នៅថ្ងៃទី ០២ ខែកញ្ញា ឆ្នាំ ២០២៥ វេលាម៉ោង ១០:០០០ នាទី លោក ចាប ឌីណា អភិបាលរងនៃគណៈអភិបាលខណ្ឌដូនពេញ បានអញ្ជើញម្ចាស់ការ៉ាស់ផ្ញើម៉ូតូនៅផ្លូវព្រះស៊ីសុវត្ថិ កែងផ្លូវលេខ ២៤០ មកអប់រំធ្វើកិច្ចសន្យា ចំពោះការយកតម្លៃថ្លៃផ្ញើម៉ូតូ ២០០០៛ លើសការណែនាំ។
ការអប់រំធ្វើកិច្ចសន្យានេះដែរ ធ្វើឡើងបន្ទាប់ពីនៅយប់ថ្ងៃទី ៣១ ខែសីហា ឆ្នាំ ២០២៥ មានបងប្អូនអ្នកសារព័ត៌មានថតវីដេអូ ស្តីពីការយកលុយ ២០០០៛ ចំពោះការផ្ញើម៉ូតូមួយគ្រឿង ខុសពីការណែនាំ។ ខណៈកន្លងមក រដ្ឋបាលបានអញ្ជើញគ្រប់ម្ចាស់ទីតាំងផ្ញើម៉ូតូដែលបានទទួលផ្ញើមកអប់រំ ធ្វើកិច្ចសន្យារួចរាល់ហើយ ហើយមួយរយៈធំនេះមិនមានប្រជាពលរដ្ឋប្តឹងផ្តល់អ្វីឡើយ ទើបតែមានករណីខាងលើនេះ។
ក្នុងករណីនេះដែរ រដ្ឋបាលខណ្ឌដូនពេញ បានថ្លែងអំណរគុណចំពោះបងប្អូនអ្នកសារព័ត៌មាន បងប្អូនប្រជាពលរដ្ឋដែលបានផ្តល់ព័ត៌មានទៅកាន់ផេករដ្ឋបាលខណ្ឌដូនពេញ ដើម្បីរដ្ឋបាលខណ្ឌមានវិធានការទាន់ពេលវេលា ព្រមទាំងស្នើសុំបងប្អូនអ្នកទទួលផ្ញើម៉ូតូទាំងអស់ មេត្តាកុំយកលុយលើសពីការណែនាំរបស់រដ្ឋបាលខណ្ឌដូនពេញ បើមិនអនុវត្ត នឹងចាត់វិធានការរដ្ឋបាលដោយមិនលើកលែងឡើយ ហើយការយកលុយលើសការណែនាំ គឺនាំឱ្យប៉ះពាល់ដល់ភ្ញៀវអញ្ជើញមកកម្សាន្ត៕
