ម៉ឺនឯក សុភារិទ្ធ ផុសសារសាមញ្ញៗលើទឹកចិត្ត ឈុំ ចាន់ដារ៉ា តែបង្កប់ន័យផ្អែមល្ហែមខ្លាំង អ្នកគាំទ្រអានចប់លួចញញឹមមិនដឹងខ្លួន

មហាជនបានជ្រាបមកហើយ នៃលទ្ធផលនៃកម្មវិធីប្រកួតសម្រស់អន្តរជាតិ Miss Supranational 2025 នារាត្រីវគ្គផ្តាច់ព្រ័ត្រថ្ងៃទី ២៧ ខែមិថុនា ឆ្នាំ ២០២៥ កន្លងទៅ (ម៉ោងក្នុងតំបន់) នៅប្រទេសប៉ូឡូញ បវរកញ្ញាតំណាងឱ្យកម្ពុជា កញ្ញា ឈុំ ចាន់ដារ៉ា មិនមានឱកាសចូល Top ឡើយ ខណៈម្ចាស់ជ័យលាភីគ្រងមកុដថ្មី Miss Supranational ប្រចាំឆ្នាំ ២០២៥ បានទៅលើបវរកញ្ញាតំណាងប្រទេសប្រេស៊ីស គឺកញ្ញា Eduarda Braum។

យ៉ាងណាមិញ បើទោះជាមិនបានជ័យជម្នះ តែមហាជនអ្នកគាំទ្រកម្ពុជាបានចែករំលែកបង្ហាញក្ដីរំភើប និង មានមោទកភាព​លើបវរកញ្ញា ឈុំ ចាន់ដារ៉ា ព្រោះនាងពិតជាបង្ហាញសមត្ថភាពបានល្អគ្រប់វគ្គប្រកួតលើឆាកដ៏ធំមួយនេះសម្រាប់កម្ពុជា ព្រម​ទាំងនាងជានារីម្នាក់ដែលអាចឱ្យអន្តរជាតិស្គាល់កម្ពុជាកាន់តែច្រើនផងដែរ។

ងាកទៅកាន់លោក ម៉ឺនឯក សុភារិទ្ធ លំដាប់រងទី ១ Mister Supranational Cambodia ឯណោះវិញ ក៏បានបង្ហោះសំណេរលើកទឹកចិត្តដល់ កញ្ញា ឈុំ ចាន់ដារ៉ា ដូចគ្នាដែរ ប៉ុន្តែអ្វីដែលធ្វើឱ្យអ្នកគាំទ្រកាន់តែចាប់អារម្មណ៍នោះ សំណេរលើកទឹកចិត្តរបស់ប្រុសសង្ហារូបនេះ ហាក់បង្កប់ពាក្យផ្អែមល្ហែមយ៉ាងច្រើន។

ក្នុងនោះ លោក ម៉ឺនឯក សុភារិទ្ធ បានរៀបរាប់ថា៖ «អូនជាអ្នកឈ្នះក្នុងចិត្តបង Chhum Chandara អូន​ធ្វើបានល្អបំផុតហើយ អូនបាននាំភាពអស្ចារ្យនូវវប្បធម៌ អរិយធម៌របស់ខ្មែរយើងទៅកាន់ពិភពលោកហើយនាំភាពអស្ចារ្យ និង បទពិសោធរបស់អូនមកប្រទេសយើងវិញ ព្រោះបទពិសោធមួយនេះ គឺជាក្តីស្រមៃរបស់មនុស្សជាច្រើន តែអូនយកវាបាន ពិតជាគួឱ្យស្ងើចសរសើរណាស់ មិនថានៅទីណា អូននឹងជោគជ័យ ព្រោះអូនជាមនុស្សឆ្លាត ស្អាត ហើយរឹងមាំ ស៊ូៗ»៕