ជារឿងមិនគួរកើត ដែលឪពុកម្តាយមិនគួរឱ្យកូនឃើញនៅពេលកំពុងរួមភេទទេ។ តែយ៉ាងណាមិញ ពេលខ្លះនៅតែភ្លាត់ ដូចជាការភ្លេចចាក់សោបន្ទប់ ឬចេញប្រតិបត្តិការនៅពេលកូនកំពុងគេងក្បែរជាដើម។
បើតាមបទសម្ភាសរវាងសារព័ត៌មាន PureWow ជាមួយ វេជ្ជបណ្ឌិត Nan Wise ឯកទេសខាងព្យាបាលផ្លូវភេទ និង ស្រាវជ្រាវផ្នែកសរសៃប្រសាទ វេជ្ជបណ្ឌិតបានផ្តល់ដំណោះស្រាយជាមួយពាក្យមួយឃ្លាយ៉ាងខ្លីគឺ «កុំភ័យស្លន់ស្លោ»។ វេជ្ជបណ្ឌិតបាននិយាយទៀតថា ជាធម្មតា រឿងនេះវានឹងអាចកើតឡើងនៅពេលក្លាយជាឪពុកម្តាយ ហើយបើកើតឡើង គប្បីផ្អាកភ្លាមៗ រួចដកដង្ហើមវែងៗ ជៀសវាងបង្ហាញអារម្មណ៍មិនល្អ ឬមិនពេញចិត្តដាក់កូន។
បើតាមអ្នកជំនាញផ្សេងទៀត រឿងមួយដែលអ្នកមិនគួរនិយាយដាក់កូននៅពេលកូនឃើញ ឬចាប់បាន គឺស្តីឱ្យបែបអាម៉ាស់ និយាយធ្វើឱ្យកូនភ័យខ្លាច ឬថាកូនរបស់អ្នកខុស។ សូម្បីវេជ្ជបណ្ឌិតម្នាក់ទៀតក៏លើកឡើងដែរថា មិនថាកូននៅអាយុប៉ុន្មាន ដាច់ខាត់កុំស្រែកដាក់ កុំខឹង ឬនិយាយអ្វីធ្វើឱ្យកូនមានអារម្មណ៍ខ្មាសអៀន។
ជំនួសឱ្យទង្វើទាំងនេះ វេជ្ជបណ្ឌិត និង អ្នកជំនាញ ផ្តល់ដំបូន្មានឱ្យនិយាយជាមួយកូនតាមសម្រួលដូចជា កូនមិនអីទេមែនទេ? ឬឱ្យកូនចេញទៅបែបស្ងប់ស្ងាត់ ជាដើម។ បើក្មេងតូច អាចលួងលោមឱ្យគេង ចំណែកក្មេងធំអាចប្រាប់ក្នុងន័យត្រូវការកន្លែងផ្ទាល់ខ្លួនសិន ឬអាចឱ្យចាំនៅក្រៅសិន ឬមួយចាំនិយាយគ្នាពេលក្រោយ៕
ប្រភព៖ NYP
