នេះហើយជាម៉ាកហ្វេហ្សិនល្បីៗពីរ ធ្វើឱ្យកម្ពុជាចំណេញខ្លាំង បានជ្រើសរើសទឹកដីអង្គរបង្ហាញទៅកាន់ពិភពលោក

មួយរយៈក្រោយនេះ កម្ពុជាទទួលបានការចាប់អារម្មណ៍ខ្លាំងពីអន្តរជាតិ សូម្បីម៉ាកហ្វេហ្សិនល្បីៗលំដាប់ពិភពលោក ក៏បានជ្រើសរើសកម្ពុជាសម្រាប់ធ្វើបេសកកម្ម ក៏ដូចជាបើកទំព័រនូវខូឡិកហ្សិនថ្មីរបស់ខ្លួន។ ​ដូចបានដឹងស្រាប់ ម៉ាកហ្វេហ្សិនដែលចេញពីអ៊ីតាលី សុទ្ធតែមានភាពល្បីល្បាញជាសកល ហេតុដូច្នេះ ពេលបានផ្សព្វផ្សាយរួមគ្នា នឹងធ្វើឱ្យកម្ពុជាមានភាពលេចធ្លោឆាប់រហ័ស។ យើងសូមលើកពីម៉ាកហ្វេហ្សិនអ៊ីតាលីចំនួនពីរ ដែលថ្មីៗនេះ ពួកគេបានជ្រើសរើសទឹកដីអង្គរ ជាការបំផុសគំនិតសម្រាប់ការបញ្ចេញខូឡិកហ្សិនថ្មី។​

១. ម៉ាក Stefano Ricci

Stefano Ricci ជាម៉ាកសម្លៀកបំពាក់ដ៏ល្បីរបស់អ៊ីតាលី ដែលផ្តោតទៅលើសម្លៀកបំពាក់ប្រណីតរបស់បុរស។ ជាមួយខូឡិកហ្សិនថ្មី Spring/Summer 2025 ម៉ាកនេះបានបង្កើតបេសកកម្មដំណើររុករកមួយឈ្មោះថា «Mission Cambodia» ឬ «បេសកកម្មកម្ពុជា» ដែលជាការសហការគ្នារវាង អ្នកថតរូប លោក Steve McCurry និង ម៉ាក Stefano Ricci ដើម្បីគោរពទៅកាន់ប្រវត្តិសាស្ត្រ ដែលមិនចេះចប់នៃទឹកដីដ៏មហាអស្ចារ្យ។ លោក Filippo Ricci  នាយកប្រតិបត្តិផ្នែកច្នៃប្រតិដ្ឋប្រចំាម៉ាក Stefano Ricci ដែលបានចុះមកផ្ទាល់ និង បាននិយាយថា គម្រោងរុករកនេះ បានចាប់ផ្តើមជាមួយទស្សនវិស័យថ្មី គឺ Luxury Lifestyle ឬ របៀបរស់នៅប្រណីត ដោយអាចឃើញផ្ទាល់នឹងភ្នែកតាមរយៈធម្មជាតិ និង អ្នកឯកទេសថតរូប។

២. ម៉ាក BVLGARI

កាលពីចុងខែមករាកន្លងទៅ ម៉ាកដ៏ប្រណីតរបស់អ៊ីតាលី BVLGARI បានជ្រើសរើសទីតាំងរៀបចំកម្មវិធីរាត្រីសមោស BVLGARI AETERNA នៅឯប្រាសាទបាយ័ន ទឹកដីខេត្តសៀមរាប។ កម្មវិធីនេះបានធ្វើឱ្យកម្ពុជាចំណេញច្រើន ជាពិសេស វត្តមានអ្នកចូលរួមជាចំណែកផ្សព្វផ្សាយមួយដ៏សំខាន់ ក្នុងនោះមានតារាអន្តរជាតិល្បីៗដូចជា៖ តារាសម្តែងថៃ កញ្ញា Mai Davika, តារាសម្តែងថៃ Mile Phakphum, តារាសម្តែងសិង្ហបុរី Shawn Thia, តារាសម្តែងសិង្ហបុរី Ayden Sng, តារាចម្រៀងវៀតណាម Ho Ngoc Ha, បវរកញ្ញាហ្វីលីពីន និង ជា Miss Univers ២០១៥ ឈ្មោះ Pia Wurtzbach ព្រមទាំងតារាល្បីៗជាច្រើនទៀត។ លើសពីនេះ មានវត្តមានពីបុគ្គលអភិជន អ្នកមានមុខមាត់នៅក្នុងសង្គម និង អ្នកមានឥទ្ធិពលជាច្រើនមកពីជុំវិញពិភពលោក។ សូម្បីសារព័ត៌មានហ្វេហ្សិនអន្តរជាតិល្បីៗដូចជា៖ Elle, L’Officiel និង​ Harper’s BAZAAR ជាដើម ក៏បានចុះផ្សាយផងដែរ៕