សម័យបច្ចេកវិទ្យា ពាក្យថាស្ត្រីបង្វិលចង្ក្រានមិនជុំ លែងមានទៀតហើយនៅក្នុងផ្នត់គំនិតប្រជាជនខ្មែរ ខណៈដែលបច្ចុប្បន្ន ស្ត្រីកម្ពុជាជាច្រើនសុទ្ធតែមានឥទ្ធិពល កាន់កាប់ការងារធំៗ និង បំពេញបេសកកម្មខ្លាំងមិនចាញ់បុរស។ ចំណោមស្ត្រីកម្ពុជាខ្លាំងច្រើនរូប យើងសូមលើកពីស្ត្រី ៤ រូប ដែលពួកគាត់ពិតជាមានឥទ្ធិពល មានសមត្ថភាព និង មានសំឡេង គួរជាទីមោទក។
១. លោកជំទាវបណ្ឌិត ពេជ ចន្ទមុន្នី
លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាអនុប្រធានអចិន្ត្រៃយ៍កាកបាទក្រហមកម្ពុជា អនុប្រធានសមាគមគ្រូពេទ្យស្ម័គ្រចិត្តយុវជនសម្តេចតេជោ និង ជាអគ្គស្នងការសមាគមកាយឫទ្ធិនារីកម្ពុជា។
២. លោកជំទាវបណ្ឌិត ជា សិរី
លោកជំទាវបណ្ឌិត ជា សិរី ជាអគ្គទេសាភិបាលធនាគារជាតិនៃកម្ពុជា។ លោកជំទាវបណ្ឌិត ជាឥស្សរជនឆ្នើមជំរុញនវានុវត្តន៍ហិរញ្ញវត្ថុកម្ពុជា និង ជាគំរូនៃការពង្រឹងសិទ្ធិអំណាចសេដ្ឋកិច្ចរបស់ស្រ្តី។
៣. លោកជំទាវ ចម និម្មល
លោកជំទាវ ចម និម្មល ជារដ្ឋមន្ត្រីក្រសួងពាណិជ្ជកម្មសម្រាប់នីតិកាលទី ៧ នៃរដ្ឋសភា។ នៅក្នុងតួនាទី ក្រៅពីចរចាដើម្បីបើកទីផ្សារ លោកជំទាវក៏បានកំពុងបណ្តុះបណ្តាលធនធានមនុស្ស និង ផ្នែកស្រាវជ្រាវទីផ្សារផងដែរ។ តាំងពីចូលបម្រើការងារក្នុងជួររដ្ឋាភិបាល លោកជំទាវរមែងដើរតួតំណាងឱ្យស្ត្រី លើកកម្ពស់យេនឌ័រទាំងនៅក្នុងវិស័យការងារ និង នៅទូទាំងប្រទេស។ ភ្ជាប់គ្នាផងនោះ លោកជំទាវបានបណ្តុះបណ្តាលយុវជនក្នុងផ្នែកសហគ្រិន ជាពិសេស ស្ត្រីដែលមានបំណងពង្រីកអាជីវកម្ម ឱ្យបានយល់ដឹងអំពីការជ្រើសរើសសេវាឥណទាន តាមផ្លូវណាដែលមានភាពងាយស្រួល ហើយសមស្របទៅតាមលទ្ធភាពរបស់ពួកគាត់។
៤. លោកជំទាវអ្នកឧកញ៉ា ម៉ៅ ចំណាន
លោកជំទាវអ្នកឧកញ៉ា ម៉ៅ ចំណាន គឺជាអ្នកជំនួញល្បីម្នាក់ និង បានជាប់ជាប្រធានសមាគមសិល្បករខ្មែរតាមរយៈការបោះឆ្នោត កាលពីថ្ងៃទី ០២ ខែឧសភា ឆ្នាំ២០២៤។ ក្នុងរយៈពេលដ៏ខ្លីនេះ លោកជំទាវអ្នកឧកញ៉ា បានដឹកនាំសមាគមសិល្បករខ្មែរ បំពេញកិច្ចការងារជាច្រើន ទាំងកិច្ចការងារសប្បុរសធម៌ អភិរក្ស អភិវឌ្ឍក្នុងវិស័យសិល្បៈ និង ចូលរួមកិច្ចការងារសង្គម។ ថ្មីៗនេះ លោកជំទាវអ្នកឧកញ៉ា ក៏បានដឹកនាំរៀបចំកម្មវិធីសម្ពោធការិយាល័យថ្មីរបស់សមាគមសិល្បករខ្មែរ ដែលមានទីតាំងស្ថិតនៅលើផ្លូវលេខ ៣៧៦ សង្កាត់បឹងកេងកង ៣ ខណ្ឌបឹងកេងកង រាជធានីភ្នំពេញ៕
