ជឿជាក់ថា អ្នកនិយមពាក់គ្រឿងអលង្ការប្រណីត ប្រាកដជាស្គាល់ច្បាស់នូវម៉ាកគ្រឿងអលង្ការដ៏ល្បីជួរមុខនៅកម្ពុជា នោះគឺ ជាង បាក់ វណ្ណ ហុង ឬ CBVH ដែលមាន លោកស្រី អ៊ឹមផាន វណ្ណឌី ជាអគ្គនាយិកា និង ជាសហស្ថាបនិកនៃក្រុមហ៊ុន។
ជាមោទកភាពមួយសម្រាប់កម្ពុជា ក៏ដូចជាស្ថាបនិកម៉ាកយីហោ ថ្មីៗនេះ ស្ថាប័ន Influential Brands ដែលជាក្រុមហ៊ុនកំណត់អត្តសញ្ញាណ និង ទទួលស្គាល់ម៉ាកដ៏មានឥទ្ធិពលនៅក្នុងទ្វីបអាស៊ី បានប្រាកាសទទួលស្គាល់គ្រឿងអលង្ការ CBVH ជាម៉ាកយីហោកំពូលនៅកម្ពុជាក្នុងវិស័យគ្រឿងអលង្ការ។
តាមរយៈការប្រកាសនៅលើទំព័រហ្វេសប៊ុក Influential Brands លោក Jorge Rodriguez នាយកគ្រប់គ្រងក្រុមហ៊ុន Influential Brands បានរៀបរាប់ថា ម៉ាកគ្រឿងអលង្ការ Cheang Bak Van Hong Jewelry (CBVH) មានភាពលេចធ្លោសម្រាប់ការថែរក្សាបច្ចេកទេសជាងមាសបែបបុរាណ ខណៈច្នៃប្រឌិតថ្មីជាមួយនឹងការរចនាបែបសហសម័យ ដែលឆ្លើយតបនឹងអ្នកប្រើប្រាស់សម័យទំនើប។
ការសង្កត់ធ្ងន់លើគុណភាព ភាពត្រឹមត្រូវ និង ផ្តល់សេវាកម្មអតិថិជនជាពិសេស បានជួយកសាងម៉ាកយីហោដ៏រឹងមាំឆ្លងពីមួយជំនាន់ទៅមួយជំនាន់។ គួបផ្សំជាមួយយុទ្ធសាស្រ្តទីផ្សារ និង អត្តសញ្ញាណម៉ាកយីហោជាក់លាក់ ម៉ាក CBVH បានពង្រឹងដោយជោគជ័យនូវមុខតំណែងរបស់ខ្លួន ជាម៉ាកដ៏គួរឱ្យទុកចិត្ត និង ជានិមិត្តរូបនៅក្នុងឧស្សាហកម្មគ្រឿងអលង្ការ ដែលធ្វើឱ្យវាទទួលបានពានរង្វាន់ដ៏មានកិត្យានុភាព និង ការជឿទុកចិត្តពីអ្នកប្រើប្រាស់គ្រឿងអលង្ការនៅក្នុងប្រទេសកម្ពុជា។
គួរឱ្យដឹងដែរថា ស្ថាប័ន Influential Brands គឺជាក្រុមហ៊ុនវិភាគដ៏ជំនាញមួយ ដែលត្រូវបានបង្កើតឡើងក្នុងគោលបំណងកំណត់អត្តសញ្ញាណ ការយល់ដឹង និង ទទួលស្គាល់ម៉ាកយីហោដ៏មានឥទ្ធិពលនៅក្នុងទ្វីបអាស៊ី។ ហេតុដូច្នេះ ការដែលម៉ាកគ្រឿងអលង្ការកម្ពុជាត្រូវបានជ្រើសរើស គឺស្តែងឱ្យឃើញពីភាពលេចធ្លោ និង ឥទ្ធិពលជាអន្តរជាតិ៕
