នៅពេលប្រទេសជាតិជួបបញ្ហា ទើបយើងគ្រប់គ្នាដឹងថា អ្វីដែលជាភាពសំខាន់បំផុតនៅក្នុងគ្រាលំបាក។ ជាកម្លាំងជំរុញចិត្តក្នុងស្ថានភាពនេះ អ្នកឧកញ៉ា គិត ម៉េង ក៏បានចែករំលែកមេរៀន ៥ យ៉ាង ដែលលោកបានរៀនពីការរស់នៅក្នុងស្ថានភាពលំបាកជាច្រើន រហូតអាចតស៊ូមកដល់សព្វថ្ងៃ។
អ្នកឧកញ៉ា គិត ម៉េង បានសរសេររៀបរាប់នៅលើទំព័រហ្វេសប៊ុកយ៉ាងដូច្នេះថា ៖
«មេរៀនដែលខ្ញុំបានរៀនពីការរស់នៅក្នុងគ្រាលំបាក
ខ្ញុំផ្ទាល់បានឆ្លងកាត់ដំណាក់កាលដ៏ខ្មៅងងឹតបំផុតជាច្រើនក្នុងប្រវត្តិសាស្ត្រជាតិយើង ដូចប្រជាជនខ្មែរជាចាស់ទុំជាច្រើនផងដែរ។ វាជាបទពិសោធដ៏ជូរចត់ ពោរពេញដោយរបួស និង ការប៉ះទង្គិចផ្លូវចិត្ត។
នៅពេលដែលអ្នកបានឆ្លងកាត់វិបត្តិជាតិមួយ ទស្សនៈជីវិតរបស់អ្នកមិនដូចគ្នាទេ។ អ្នកដឹងថា គ្មានអ្វីជារបស់អ្នកពិតនោះទេ លើកលែងតែសុចរិតភាព និង គុណធម៌របស់អ្នក។ ថ្ងៃនេះ ខ្ញុំចង់ចែករំលែកមេរៀនចំនួន ៥ ដែលខ្ញុំបានរៀនពីការរស់នៅក្នុងស្ថានភាពលំបាកជាច្រើន ហើយខ្ញុំសង្ឃឹមថាមេរៀនទាំងនេះ នឹងរម្លឹកយើងទាំងអស់គ្នានូវអ្វី ដែលសំខាន់ពិតប្រាកដ ៖
១. ជីវិតមនុស្សគឺជាទ្រព្យដ៏អស្ចារ្យបំផុត
នៅពេលស្ថានភាពលំបាកកើតទ្បើង អ្នករៀនយល់ដឹងបានយ៉ាងឆាប់រហ័សនូវអ្វី ដែលសំខាន់។ អ្វីដែលសំខាន់នោះមិនមែនទឹកដី ឬអំណាចនោះទេ ប៉ុន្តែជាការការពារប្រជាជន។ ជាក់ស្តែង ដូចករណីរាជរដ្ឋាភិបាលយើងប្រយុទ្ធតស៊ូរាល់ថ្ងៃនេះ គឺដើម្បីរក្សាសុវត្ថិភាពឱ្យយើង។ នៅពេលដែលអ្វីគ្រប់យ៉ាងប្រឈមនឹងហានិភ័យ បេសកកម្មចម្បងតែមួយគត់របស់អ្នកដែលត្រូវធ្វើនោះ គឺការពារសុវត្ថិភាពដល់មនុស្សជាទីស្រទ្បាញ់របស់អ្នក។
២. ការរួបរួម និង ឯកភាពគ្នាជាធ្លុងមួយគឺខ្លាំងជាងអ្វីៗទាំងអស់
កាលពីមុន ខ្ញុំបានឃើញការរួបរួមគ្នា ហើយឥទ្បូវនេះ ខ្ញុំក៏ឃើញការរួបរួមនេះដែរ។ នៅពេលដែលប្រជាជនរួបរួមគ្នា សហគមន៍ជួយគ្នាទៅវិញទៅមក យើងមានគោលដៅរួមគ្នាមួយ ដោយជំនួសឱ្យការខ្វែងគំនិតគ្នា នោះយើងអាចជម្នះលើអ្វី ដែលមនុស្សតែឯងមិនអាចធ្វើបាន។
៣. ជ័យជម្នះគ្មានន័យអ្វីទេ បើវាមិនបានជួយអ្នកដទៃ
ពេលវេលាលំបាកបង្ហាញអ្នកឱ្យឃើញពីរបៀបដែលបុគ្គលម្នាក់ៗអាចសម្រេចបានសមិទ្ធផលរបស់ពួកគេ។ នៅពេលអ្នកបានឃើញគ្រួសារជាច្រើនបាត់បង់អ្វីៗទាំងអស់ក្នុងពេលតែមួយប៉ប្រិចភ្នែក អ្នកដឹងថា ភាពជោគជ័យពិតនោះគឺត្រូវតែជួយអ្នកដទៃ មិនមែនលើកមុខមាត់តែម្នាក់ឯងនោះទេ។
៤. ភាពធន់គឺជាកម្លាំងស្ងៀមស្ងាត់
គ្រាលំបាកសាកល្បងភាពអត់ធ្មត់របស់អ្នក ប៉ុន្តែភាពអត់ធ្មត់របស់យើងជាខ្មែរមិនមែនជាការរង់ចាំដោយមិនធ្វើអ្វីនោះទេ។ ភាពអត់ធ្មត់របស់យើងគឺយូរអង្វែង។ ភាពធន់របស់យើងកើតចេញពីការយល់ដឹង ពីកម្លាំង និង ពីភាពជឿជាក់ នោះគឺភាពជឿជាក់លើខ្លួនយើង និង មេដឹកនាំរបស់យើង។
៥. កុំភ្លេចឫសគល់របស់អ្នកឱ្យសោះ
សព្វថ្ងៃនេះ ទោះបីជាខ្ញុំកាន់ឋានៈខ្ពស់ ប៉ុន្តែចិត្តរបស់ខ្ញុំនៅតែចងចាំគ្រាដ៏លំបាកទាំងនោះ ពោលគឺការតស៊ូ ភាពស្ងៀមស្ងាត់ និង ផលប៉ះពាល់ផ្លូវចិត្ត។ ការឆ្លងកាត់ពេលវេលាទាំងនោះធ្វើឱ្យខ្ញុំរក្សាឫសគល់របស់ខ្ញុំ ហើយរម្លឹកខ្ញុំឱ្យដឹកនាំប្រកបដោយការដឹងគុណ និង មិនមានអំនួតលើខ្លួនឯង។ ខ្ញុំរឹតតែឱ្យតម្លៃលើអត្តសញ្ញាណរបស់យើង ការពារប្រជាជនយើង និង ចងចាំមិនភ្លេចឫសគល់យើង។
គោលគំនិតទាំងអស់នេះហើយ ដែលធ្វើឱ្យខ្ញុំត្រលប់មកកម្ពុជាវិញ ដើម្បីកសាងក្រុមហ៊ុន រ៉ូយ៉ាល់គ្រុប។ ពិតណាស់ គ្រាលំបាកបង្កឱ្យមានការបាត់បង់ ការឈឺចាប់យ៉ាងច្រើនដល់ជំនាន់ខ្ញុំ និង ជំនាន់ផ្សេងទៀតរបស់ប្រជាជនក្នុងប្រវត្តិខ្មែរយើង ប៉ុន្តែវាក៏បានធ្វើឱ្យយើងមានកម្លាំងរឹងមាំ និង ភាពធន់។
មិនថាយប់យូរបែបណា ស្មារតីខ្មែរនៅតែស្ថិតស្ថេរជានិច្ច។
នៅពេលថ្ងៃរះនៅថ្ងៃស្អែក យើងកសាងក្តីសង្ឃឹមទ្បើងវិញ មិនមែនសម្រាប់តែខ្លួនយើងប៉ុណ្ណោះទេ ប៉ុន្តែសម្រាប់មនុស្សជំនាន់ក្រោយជាច្រើនទៀត»៕
ប្រភព៖ អ្នកឧកញ៉ា គិត ម៉េង
