ខ្លាំងអីជាមួយមេធាវី! មេធាវីម្នាក់ទៅមើលកុន តែរោងកុនផ្សាយពាណិជ្ជកម្មយូរពេក ពួយប្ដឹងរហូតឈ្នះក្ដីបានសំណងរាប់រយដុល្លារ

ថ្មីៗនេះ សារព័ត៌មានរបស់ឥណ្ឌា បានរាយការណ៍ពីករណីរបស់បុរសម្នាក់ដែលឈ្នះក្តីជាមួយនឹងរោងកុនមួយកន្លែង ក្រោយពីមិនសុខចិត្តរឿងរោងកុនផ្សាយពាណិជ្ជកម្មយូរពេក ធ្វើឱ្យចាក់រឿងយឺត ហើយខ្លួនត្រូវខាតពេលទៅធ្វើការ។

តាមព័ត៌មានបានឱ្យដឹងថា បុរសរូបនេះវ័យ ៣១ ឆ្នាំ មានអាជីពជាមេធាវី។​ កាលពីថ្ងៃទី ២៦ ខែធ្នូ ឆ្នាំ ២០២៣​ កន្លងទៅ គេបានទិញសំបុត្រកុនចំនួន ៣ សន្លឹក ដើម្បីទស្សនារឿង «Sam Bahadur» ដែលត្រូវចាក់នៅម៉ោង ៤ និង ៥ នាទីល្ងាច រហូតដល់ម៉ោង ៦ និង ៣០ នាទីយប់ នៅក្នុងរោងកុន PVR INOX ។ តែយ៉ាងណាមិញ ខាងរោងកុនបានផ្សាយពាណិជ្ជដែលស៊ីពេលអស់រហូត ២៥ នាទី ធ្វើឱ្យការចាក់រឿងក៏ត្រូវបានយឺតយ៉ាវ និង បានបញ្ចប់នៅម៉ោង ៧ ល្ងាច គឺលើសពីពេលវេលាកំណត់ ដែលធ្វើឱ្យបុរសរូបនេះត្រូវខកខានការណាត់ជួបពិភាក្សាការងារសំខាន់របស់ខ្លួន។

ដោយសារតែការមិនពេញចិត្ត បុរសរូបនេះក៏បានដាក់ពាក្យប្តឹងរោងកុន ដោយអះអាងថាធ្វើឱ្យខ្លួនខាតពេលវេលា ហើយក្រោយពីឆ្លងកាត់ការកាត់ក្តីមករយៈ ១ ឆ្នាំ ចុងក្រោយខាងតុលាការក៏បានសម្រចឱ្យខាងរោងកុនសងសំណងទៅកាន់បុរសខាងលើនេះចំនួន ២៨០០០ រូពី ដែលស្មើប្រមាណជាង ៣២០ ដុល្លារផងដែរ៕

ប្រភព៖ Khaosod