នៅថ្ងៃទី ១០ ខែសីហា ឆ្នាំ ២០២៥ ក្រុមអនុព័ន្ធយោធាបរទេសប្រចាំកម្ពុជា (MACPP) សរុបចំនួន ៩ ប្រទេស ស្មើនឹង ១៤ រូប បានចុះទៅពិនិត្យស្ថានភាពជាក់ស្ដែង ក្នុងភូមិសាស្រ្តស្រុកបន្ទាយអំពិល ខេត្តឧត្តរមានជ័យ។
តាមរយៈការចុះត្រួតពិនិត្យនេះ លោកឧត្តមសេនីយ៍ត្រី នាក់ វង្ស មេបញ្ជាការកងពលតូចថ្មើរជើងលេខ ៤២ ទិសប្រាសាទតាមាន់ បានថ្លែងប្រាប់ក្រុមអនុព័ន្ធយោធាបរទេសថា ភាគីថៃបានរំលោភបទឈប់បាញ់ ដោយបាញ់ចម្ពាមគ្រាប់ឃ្លីជាង ១០០ គ្រាប់ ចូលលេណដ្ឋានទាហានខ្មែរ នៅយប់ថ្ងៃទី ៩ ខែសីហា ឆ្នាំ ២០២៥ ដែលក្នុងនោះលោក នាក់ វង្ស បានបញ្ជាក់ថា ទាហានខ្មែរបានត្រឹមរាយការណ៍ករណីនេះទៅថ្នាក់លើប៉ុណ្ណោះ ដោយមិនមានការតបតអ្វីនោះឡើយ។
គួរឱ្យដឹងផងដែរថា ក្រុមអនុព័ន្ធយោធាបរទេសប្រចាំកម្ពុជា មកពី ៩ ប្រទេស ដែលបានចុះពិនិត្យស្ថានភាពនៅថ្ងៃទី ១០ ខែសីហា រួមមាន៖ អូស្រ្តាលី អង់គ្លេស កាណាដា ចិន បារាំង ជប៉ុន កូរ៉េខាងត្បូង ឡាវ និង វៀតណាម៕
