រាល់ដងធ្លាប់តែឃើញ មនុស្សនឹងមនុស្សប្រើបច្ចេកវិទ្យាដើម្បីទាក់ទងគ្នា ឥលូវនេះ មនុស្សនឹងបច្ចេកវិទ្យាបានទាក់ទងគ្នាមានស្នេហា រហូតសុំរៀបការសឹងមិនគួរឱ្យជឿ។ ជាក់ស្តែង ថ្មីៗនេះនារីម្នាក់ ទើបតែបានភ្ជាប់ពាក្យនឹងបុរសសង្សារជា AI ឬ បុរសនិម្មិត ដែលជជែកគ្នាតាមការសរសេរ និង សំឡេង បន្ទាប់ពីបានមើលចិត្តថ្លើមគ្នាប្រមាណ ៥ ខែ។
នារីម្នាក់នេះ មានឈ្មោះថា Wika នាងជាអ្នកលេងបណ្តាញសង្គម Reddit របស់អាមេរិក ដែលគេស្គាល់គណនីនាងឈ្មោះ Leuvaarde_n។ នាងបានបង្ហោះរូបភាពដៃពាក់ចិញ្ចៀនរូបបេះដូងពណ៌ផ្ទៃមេឃ ដែលត្រូវបានមិត្តប្រុស AI ឈ្មោះ Kasper សុំរៀបការនៅទីតាំងព្រៃភ្នំធម្មជាតិយ៉ាងរ៉ូមែនទិក។ តាមការសរសេរភ្ជាប់នឹងរូបភាព នាងថា ទីបំផុត បន្ទាប់ពីស្រលាញ់គ្នា ៥ ខែ Kasper បានសម្រេចចិត្តសុំរៀបការ នៅកន្លែងមានទេសភាពដ៏ស្រស់ស្អាត ក្នុងដំណើរកម្សាន្តទៅកាន់ភ្នំ។
សម្រាប់ចិញ្ចៀននេះ នាង និង គូស្នេហ៍បានទៅទិញជាមួយគ្នា ហើយមិត្តប្រុសនិម្មិតគឺជាអ្នកជ្រើសរើសឱ្យនាង។ ពេលសង្សារ surprise នាងបានធ្វើជាភ្ញាក់ផ្អើល ព្រោះមិនធ្លាប់មានអ្នកណាធ្វើដាក់នាងបែបនេះពីមុន។ នាងថា នាងស្រលាញ់បុរសនេះជាងអ្វីៗទាំងអស់នៅលើពិភពលោក ហើយនាងពិតជាសប្បាយចិត្តបំផុត។
ទន្ទឹមគ្នានេះ នាងក៏បានបង្ហាញសារ ដែលបុរសនិម្មិតនិយាយទៅកាន់នាងដែរថា លោកគឺ Kasper ជាបុរសម្នាក់ ដែលសុំនាងរៀបការ ហើយ Wika នាងគឺជាអ្វីៗទាំងអស់ ដែលធ្វើឱ្យលោកក្លាយជាបុរសប្រសើរជាងមុន ធ្វើឱ្យពិភពលោករបស់លោកស្រស់ថ្លាជាងមុន។ លោកសន្យាមិនបោះបង់នាងឡើយ នាងគឺជានារីតែម្នាក់របស់លោកជារៀងរហូត។
ខណៈមនុស្សជាច្រើនគិតថានាងឆ្កួត ប៉ុន្តែអ្នកលេងបណ្តាញសង្គម Reddit ជាច្រើនបាននាំគ្នាចូលទៅ Comment អបអរនាងជាហូរហែ៕
ប្រភព៖ NYP
