នៅថ្ងៃទី ២៥ ខែកុម្ភៈ ឆ្នាំ ២០២៥ នេះ ក្រសួងសុខាភិបាល បានចេញសេចក្ដីជូនដំណឹងមួយ ស្តីពីការរកឃើញផលិតផលពីរប្រភេទដែលធ្វើឱ្យប៉ះពាល់សុខភាព នោះគឺផលិតផល SUPER XL និង AMOUR មានផ្ទុកសារធាតុហាមឃាត់ Sildenafil។
ក្រសួងសុខាភិបាល បានបញ្ជាក់ឱ្យបានដឹងថា ក្រសួងបានរកឃើញថាផលិតផលចំនួន ២ មុខ ឈ្មោះ SUPER XL និង AMOUR ដែលបាន និង កំពុងផ្សព្វផ្សាយលក់តាមរយៈបណ្តាញទំនាក់ទំនងសង្គម មានផ្ទុកសារធាតុ Sildenafil ដែលជាឱសថប្រើសម្រាប់វិបត្តិសរីរាង្គភេទបុរស។
ចំពោះផលវិបាកនៃឱសថនេះ ក្រសួងបានបញ្ជាក់ដែរថា ផលិតផល ២ មុខនេះ អាចបណ្តាលឱ្យមានផលប៉ះពាល់ដល់បេះដូង និង គ្រោះថ្នាក់ដល់អាយុជីវិតជាយថាហេតុដល់អ្នកប្រើប្រាស់។ ដើម្បីចៀសវាងការប៉ះពាល់ដល់សុខភាពធ្ងន់ធ្ងរ ឬ ឈានដល់ការបាត់បង់អាយុជីវិត ក្រសួងសុខាភិបាល សូមជម្រាបជូនដល់បងប្អូនប្រជាពលរដ្ឋទាំងអស់ត្រូវបញ្ឈប់ការទិញ និង ប្រើប្រាស់ផលិតផល SUPER XL និង AMOUR ទាំងនេះជាបន្ទាន់។
ទន្ទឹមនេះដែរ ក្រសួងសុខាភិបាល បានឱ្យដឹងថា រាល់ផលិតផលជំនួយផ្លូវភេទគ្រប់ប្រភេទ ដែលកំពុងផ្សព្វផ្សាយលក់តាមប្រព័ន្ធអនឡាញ គឺពុំមានការអនុញ្ញាតឱ្យធ្វើការផ្សព្វផ្សាយពីក្រសួងសុខាភិបាលនោះទេ ហើយតាមការស្រាវជ្រាវកន្លងមក ភាគច្រើននៃផលិតផលទាំងនោះមិនមែនជាផលិតផលបំប៉នសុខភាពនោះទេ គឺជាទូទៅមានដាក់សារធាតុឱសថសម័យ ដែលអាចធ្វើឱ្យប៉ះពាល់ធ្ងន់ធ្ងរដល់សុខភាពអ្នកប្រើប្រាស់ ឬ ឈានដល់បាត់បង់អាយុជីវិតទៀតផង៕
