នៅថ្ងៃទី ១៩ ខែឧសភា ឆ្នាំ ២០២៥ កន្លងទៅ ការិយាល័យស៊ើបអង្កេតកណ្តាល (CIB) ផ្នែកបង្ក្រាបឧក្រិដ្ឋកម្មសេដ្ឋកិច្ច (ECD) របស់ថៃ បានបើកប្រតិបត្តិការបង្ក្រាបទំនិញក្លែងក្លាយ ដោយមានជនជាតិចិនជាមេខ្លោង ហើយរឹបអូសបានទំនិញក្លែងក្លាយជាច្រើន សរុបទឹកប្រាក់ជាង ៥០ លានបាត ដែលស្មើប្រមាណជាង ១.៥ លានដុល្លារ។
ប្រតិបត្តិការបង្រ្កាបនេះ បានធ្វើឡើងនៅក្នុងឃ្លាំងមួយ នៅក្នុងស្រុកមឿង ខេត្តសាមុតសាខន ដោយឃាត់ខ្លួនបានបុរសជាជនជាតិចិនចំនួន ២ នាក់ មានម្នាក់អាយុ ២៧ ឆ្នាំ និង ម្នាក់ទៀតអាយុ ១៩ ឆ្នាំ។ ក្នុងនោះប៉ូលិសបានរឹបអូសផលិតផលក្លែងក្លាយជិត ៨ ម៉ឺនមុខ ដែលដាក់លក់តាមអ៊ីនធឺណេតមានដូចជា គ្រីមលាបមុខ ឡេលាបខ្លួន អាហារបំប៉ន ខូឡាជេន សេរ៉ូម ស្រោមអនាម័យ ក៏ដូចជាកាបូបប្រ៊េនល្បីៗដែលបំពានច្បាប់នាំចូល។
យ៉ាងណាមិញ ជនជាតិចិនទាំង ២ នាក់ ត្រូវប៉ូលិសឃាត់ខ្លួនទៅដំណើរការក្តីទៅតាមផ្លូវច្បាប់ ហើយផលិតផលទាំងអស់ក៏ត្រូវបានរឹបអូសទៅត្រួតពិនិត្យ និងជាភស្តុតាង ដើម្បីកាត់ក្តីមេខ្លោងទាំង ២ នាក់ផងដែរ៕
ប្រភព៖ Kapook
