បន្ទាប់ពីការបោះជំហានក្នុងការប្រកួត Miss Teen Cambodia 2025 របស់ ជូរី ល្អហួស ហើយនោះ ទីបំផុតលទ្ធផលនៃការទទួលបានរបស់បវរកញ្ញាវ័យក្មេងរូបនេះ ដូចជាការរំពឹងទុករបស់អ្នកគាំទ្រយ៉ាងដូច្នោះ ដោយ ជូរី ល្អហួស ក្ដោបបានមកុដ Miss Teen Cambodia 2025 ហើយ កាលពីរាត្រីថ្ងៃទី ១៦ ខែវិច្ឆិកា ឆ្នាំ ២០២៥ កន្លងទៅ។
ក្នុងនោះដែរ មកុដនេះ គឺជាតំណែងថ្មីសម្រាប់ ជូរី ល្អហួស លើវិស័យបវរកញ្ញា បន្ទាប់ពីនាងក្តោបបានមកុដ Miss Preteen Cambodia 2023 និង បានប្រកួតឈ្នះមកុដលើឆាកអន្តរជាតិ Miss Preteen Junior Idol World 2024 កាលពីអំឡុងខែមីនា ឆ្នាំ ២០២៤ កន្លងទៅ។
ជាការពិតណាស់ ស្របពេលនៃភាពជោគជ័យទទួលបានការសាទរ និង សរសើរ ទៅកាន់ ជូរី ល្អហួស ថាពិតជាមានសមត្ថភាព និង សម្រស់ស័ក្តិសមនឹងតំណែងក៏ពិតមែន កន្លងមក ក៏ធ្លាប់មានមតិតិចតួចលើកឡើងថា នាងឈ្នះក៏ព្រោះតែទឹកលុយ នាងឈ្នះក៏ព្រោះជាអ្នកមាន ។
យ៉ាងណាមិញ មុននឹងគ្រងមកុដ Miss Teen Cambodia 2025 បាន ១ ថ្ងៃ ពោលគឺនៅថ្ងៃទី ១៥ ខែវិច្ឆិកា ឆ្នាំ ២០២៥ កន្លងទៅ ជូរី ល្អហួស ទទួលបានការបញ្ចេញមតិមួយថា៖ «អ្នកមានតែងតែឈ្នះ» ពីអ្នកលេងបណ្តាញសង្គមមួយរូប ហើយនាងក៏បានឆ្លើយតបវិញថា៖ «បងគិតមកលើ ល្អហួស គឺខុសហើយ! នាងខ្ញុំតែងតែយកសមត្ថភាពរបស់ខ្លួនឯង ទៅប្រកួតប្រជែង មិនមែនប្រើលុយ ដើម្បីឈ្នះនោះទេ។ កម្មវិធី តែងតែជ្រើសរើសអ្នកមានសមត្ថភាពពិតប្រាកដ តែបើបងៗ ដែលមានធនធាន និង បងៗដែលមិនមានធនធាន តែបើសមត្ថភាពគាត់លើសគេ ខ្លាំងជាងគេ គាត់នឹងឈ្នះមកុដដោយសេចក្តីថ្លៃថ្នូរ»៕
