នៅសល់តែប៉ុន្មានថ្ងៃទៀតប៉ុណ្ណោះ ភ្លេងការរវាងតារាចម្រៀងប្រុសរូបសង្ហា ខាយ និង កញ្ញា មុន្នីនាថ នឹងប្រគំឡើង ក្រោមការរៀបចំដឹងឮពីសំណាក់ចាស់ទុំ មេបាទាំងសងខាង ព្រមទាំងភ្ញៀវកិត្តិយសជិតឆ្ងាយ ដើម្បីផ្សំផ្គុំគូដណ្ដឹងក៏ស័ក្ដិសមមួយគូនេះ ក្លាយជាគូស្វាមីភរិយាតាមប្រពៃណី ខណៈមង្គលការរបស់អ្នកទាំងពីរ នឹងរៀបចំឡើងនៅទឹកដីកំណើតខាងស្រី នាខេត្តសៀមរាប។
ខណៈកំពុងត្រៀមខ្លួនក្លាយជាកូនក្រមុំដ៏ស្រស់ស្អាតនៅថ្ងៃទី ១ ខែមីនា ឆ្នាំ ២០២៥ ខាងមុននេះ ស្រាប់តែកញ្ញា មុន្នីនាថ បានសរសេររៀបរាប់នូវសំណេរដ៏មានអត្ថន័យមួយ ផ្ដាំផ្ញើដល់សុភាពនារីទាំងឡាយ ដែលមិនទាន់ជួបគូជីវិតពិត គួររៀបចំជីវិតខ្លួនឯងជាមុនសិន ដើម្បីរង់ចាំបុរសពិតប្រាកដម្នាក់ អាចកាន់ដៃគ្នា ស្រឡាញ់មើលថែគ្នានៅថ្ងៃខាងមុខ។
អនាគតកូនក្រមុំតារាចម្រៀង ខាយ រូបនេះ បានរៀបរាប់ថា ៖ «សំណេរមុនថ្ងៃចូលរោងការជូនមនុស្សស្រីជាទីស្រលាញ់គ្រប់រូប… រក្សាតម្លៃកិត្តិយសជាមនុស្សស្រីរបស់ខ្លួនឱ្យបានល្អប្រពៃ អភិវឌ្ឍន៍ខ្លួនឱ្យកាន់តែរីកចម្រើនមានលំនឹងលើខ្លួនឯងពីមួយថ្ងៃទៅមួយថ្ងៃ… អាចមិនទាន់ក្នុងពេលនេះ តែនៅថ្ងៃណាមួយនឹងមានមនុស្សប្រុសដ៏ល្អម្នាក់យល់ច្បាស់ពីក្តីស្រលាញ់ នឹងមកដល់ចំពេលវេលាមួយដ៏ស័ក្តិសម ការរង់ចាំមនុស្សប្រុសម្នាក់នោះយូរ ឬឆាប់ អាស្រ័យលើការដែលយើងមានភាពច្បាស់លាស់ មានលំនឹងលើខ្លួនឯងកម្រិតណា»៕
