មហាជនច្បាស់ជាបានជ្រាបមកហើយពីការប៉ះទង្គិចគ្នារវាងកងទ័ពកម្ពុជា និង កងទ័ពថៃ ដែលបានកើតឡើងនៅព្រឹកថ្ងៃទី ២៨ ខែឧសភា ឆ្នាំ ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ។
ក្នុងនោះ ក្រោយមានការប៉ះទង្គិចហើយនោះ នៅថ្ងៃដដែលនាពេលរសៀល ក្រសួងការពារជាតិ ក៏បានចេញសេចក្ដីប្រកាសព័ត៌មាន ថាកងទ័ពថៃបានធ្វើការបាញ់ប្រហារមុនមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជា ជាយូរលង់ណាស់មកហើយ បណ្តាលឱ្យបាត់បង់ជីវិតកងទ័ពយើងម្នាក់។ ការប៉ះទង្គិចគ្នានេះមិនមែនជាជម្រើស ដែលកម្ពុជាចង់បាននោះទេ ហើយយើងនឹងបន្តពិភាក្សាជាមួយក្រសួងការពារជាតិថៃ ដើម្បីស្វែងរកដំណោះស្រាយរួមមួយ ក្នុងការធ្វើឱ្យស្ថានភាពវិលត្រឡប់ទៅដូចដើមវិញឱ្យបានឆាប់រហ័ស និង បង្ការកុំឱ្យស្ថានភាពនេះកើតឡើងសាជាថ្មីម្តងទៀត។
ក្រសួងការពារជាតិ បានបន្តថាកម្ពុជាប្រកាន់ខ្ជាប់នូវមធ្យោបាយការទូត និង ការដោះស្រាយបញ្ហាដោយសន្តិវិធី ព្រមទាំងការរក្សាព្រំដែនរបស់ខ្លួនជាមួយប្រទេសជិតខាងជាព្រំដែនសន្តិភាព ស្ថេរភាព ការអភិវឌ្ឍន៍ និង កិច្ចសហប្រតិបត្តិការដែលផ្តល់ប្រយោជន៍ឱ្យគ្នាទៅវិញទៅមក។ កម្ពុជាប្តេជ្ញាចិត្តក្នុងការការពារបូរណភាពទឹកដីទោះក្នុងតម្លៃណាក៏ដោយ។
ដោយឡែក មកមើលមហាជននៅក្នុងបណ្តាញសង្គមហ្វេសប៊ុកឯណោះវិញ កំពុងស្រុះគ្នាប្រមូលថវិកា និង ស្បៀងអាហារជាបន្តបន្ទាប់ជូនដល់កងទ័ព កំពុងឈរជើងនៅទីនោះ។ ក្នុងនោះ ក៏ឃើញមានតារាចម្រៀង ថេណា ផងដែរ។
តាមរយៈការបង្ហោះពីអ្នកនាង ឡុង ម៉ានីន គូស្នេហ៍លោក ថុល សុភិទិ បានឱ្យដឹងថា តារាចម្រៀងប្រុស ថេណា បានជូនថវិកាចំនួន ៣ ពាន់ដុល្លារតាមរយៈអ្នកនាង ដើម្បីសម្រួលផ្នែកស្បៀងអាហារជូនដល់កងទ័ព។ ក្នុងនោះ អ្នកនាង ឡុង ម៉ានីន បានរៀបរាប់ថា៖ «Idol Tena Khimphun គាត់ចូលជាថវិកាតាមខ្ញុំ 3000 ដុល្លារ ដើម្បីទិញជាស្បៀងអាហារជូនដល់បងៗកងទព័ការពារជាតិយើង»៕
