ពិតណាស់ នៅថ្ងៃទី ១៧ ខែវិច្ឆិកា ឆ្នាំ ២០២៤ កន្លងទៅនេះ កម្មវិធីប្រកួតសម្រស់ដ៏អស្ចារ្យ Miss Universe 2024 លើកទី ៧៣ បានប្រកួតវគ្គផ្ដាច់ព្រ័ត្រ និង រកឃើញម្ចាស់ជ័យលាភីគ្រងមកុដ Miss Universe ប្រចាំឆ្នាំ ២០២៤ នេះហើយ គឺបានទៅលើបវរកញ្ញាមកពីប្រទេស Denmark។
ក្នុងវគ្គប្រកាសលទ្ធផលផ្ដាច់ព្រ័ត្រនេះដែរ មហាជនអ្នកលេងបណ្ដាញសង្គមតាមដានវិស័យបវរកញ្ញាទូទាំងពិភពលោកបានបង្ហាញការអបអរសាទរដោយការពេញចិត្តខ្លាំង ចំពោះម្ចាស់ជ័យលាភីគ្រងមកុដថ្មី Miss Universe 2024 គឺបវរកញ្ញាមកពីប្រទេស Denmark នេះ ដែលនាងមានទាំងរូបសម្រស់ ចំណេះដឹង សមត្ថភាពខ្លាំង ព្រមទាំងបទពិសោធន៍ច្រើនលើវិស័យបវរកញ្ញា។
បើនិយាយពីម្ចាស់រាជិនីគ្រងមកុដថ្មី Miss Universe 2024 ឈ្មោះ Victoria Kjaer នេះ កំពុងត្រូវបានមហាជនអ្នកគាំទ្រវិស័យបវរកញ្ញាទូទាំងពិភពលោកចាប់អារម្មណ៍ចង់ដឹងរឿងរ៉ាវផ្សេងៗពាក់ព័ន្ធនឹងម្ចាស់មកុដថ្មីរូបនេះ ជាពិសេសមហាជនអ្នកគាំទ្រនៅកម្ពុជាក៏កំពុងផ្ទុះការចាប់អារម្មណ៍ចែករំលែក ខណៈត្រូវបានគេដឹងថានាងធ្លាប់ជាអតីតបេក្ខនារីប្រកួតក្នុងកម្មវិធី MGI កាលពីឆ្នាំ ២០២២ ជំនាន់ជាមួយនឹងបវរកញ្ញា ពេជ្រវត្តី សារ៉ាវឌ្ឍី ដោយពេលនោះ Victoria Kjaer ទទួលបាន Top 20 នៃកម្មវិធី MGI 2022 ផងដែរ។
ស្របពេលដែលអតីតបេក្ខភាពបវរកញ្ញា MGI 2022 រូបនេះ បានក្លាយជាម្ចាស់រាជិនីមកុដ Miss Universe 2024 ភ្លាម ក្រឡេកមើលហ្វេសប៊ុករបស់បវរកញ្ញា ពេជ្រ វត្តីសារ៉ាវឌ្ឍី ក៏បានបង្ហោះសារមួយបង្ហាញការចូលរួមអបអរក្នុងនាមជាមិត្តរួមជំនាន់ប្រកួតរបស់ Victoria Kjaer ដោយបានឈ្នះមកុដ MU 2024 នេះថា ៖ «Congratulations DENMARK មិត្តភក្តិ តីតី បានមកុដ»។
ក្រោយបានឃើញបវរកញ្ញា ពេជ្រ វត្តីសារ៉ាវឌ្ឍី បង្ហោះអបអរចំពោះ Miss Universe Denmark អតីតមិត្តជំនាន់ប្រកួត MGI បែបនេះ ងាកទៅមើលមហាជនអ្នកលេងបណ្ដាញសង្គមវិញក៏បានចូលចែករំលែក និង បញ្ចេញមតិវែកញែកបញ្ចើចបញ្ចើដល់កញ្ញា ពេជ្រ វត្តីសារ៉ាវឌ្ឍី ជាច្រើន ធ្វើឱ្យនាងរអានឹងការបង្ហោះនេះយ៉ាងខ្លាំង៕
