រយៈពេលជាង ១ សប្ដាហ៍ហើយ ដែលបវរកញ្ញា ផន ស្រីពី កំពុងស្ថិតក្នុងដំណើរការប្រកួតលើឆាកអន្តរជាតិ Miss Cosmo 2025 នៅប្រទេសវៀតណាម ដោយពីវគ្គថ្ងៃទៅវគ្គថ្ងៃ បវរកញ្ញារូបនេះ កាន់តែបង្ហាញពីសក្កានុពល និង ភាពជឿជាក់ រឹងមាំស្វាហាប់ក្នុងដំណើរការប្រកួត ទាំងទំនាក់ទំនង និង រៀបចំខ្លួនស្អាតឆ្វាចៗលេចធ្លោខ្លាំង ដ្បិតតែនាងពុំសូវមានកម្លាំងចិត្ត ខណៈមិនសូវទទួលបានសំឡេងគាំទ្រច្រើនពីមហាជនកម្ពុជា។
ស្របពេលនេះដែរ បើងាកមើលហ្វេសប៊ុកផេកក្រុមអ្នកគាំទ្របវរកញ្ញាជាច្រើន កំពុងបង្ហោះអំពាវនាវរកសំឡេងគាំទ្រពីមហាជនឱ្យបវរកញ្ញា ផន ស្រីពី ខណៈក្នុងដំណើរការប្រកួតរបស់នាងប៉ុន្មានថ្ងៃកន្លងទៅ ស្ងាត់ពុំសូវមានការចាប់អារម្មណ៍គាំទ្រច្រើនពីមហាជនប៉ុន្មានឡើយ។ លើសពីនេះ ដោយសារមិនសូវទទួលបានការដានតាមគាំទ្រពីមហាជនកម្ពុជា ផន ស្រីពី ក៏បានបង្ហាញការអាក់អន់ចិត្តខ្លះៗដែរ ប៉ុន្តែនាងនៅតែបង្ហាញឆន្ទៈមិនបោះបង់ និង បន្តខំប្រឹងប្រែងបង្ហាញឱ្យអស់ពីសមត្ថភាពឈរលើឆាកអន្តរជាតិមួយនេះ ដើម្បីមុខមាត់ប្រទេសកម្ពុជា។
ដោយឡែក ក្រៅពីផេកគាំទ្រវិស័យបវរកញ្ញា ងាកមើលអ្នកក្នុងសិល្បៈវិញ ក៏បានឃើញកំពូលតារាចម្រៀងប្រុស ណុប បាយ៉ារិទ្ធ ចែករំលែកសារលើហ្វេសប៊ុកពីបវរកញ្ញាកម្ពុជា ផន ស្រីពី ដោយលោកចូលរួមបង្ហាញការគាំទ្រលើកទឹកចិត្ត និង ផ្ដល់កម្លាំងចិត្តដល់ ស្រីពី ដែលកំពុងតំណាងកម្ពុជាប្រកួតកម្មវិធីអន្តរជាតិមួយនេះ។ ជាមួយគ្នានោះ លោក ក៏បានបញ្ចេញជាមតិក្នុងន័យអំពាវនាវសូមឱ្យបងប្អូនមហាជនកម្ពុជា ចូលរួមតាមដានគាំទ្រ និង លើកទឹកចិត្តដល់បវរកញ្ញារូបនេះ ដើម្បីឱ្យនាងមានកម្លាំងចិត្តប្រកួត នាំភាពជោគជ័យមកមាតុភូមិវិញ។
ក្នុងនោះ លោក ណុប បាយ៉ារិទ្ធ បានបង្ហោះរៀបរាប់ថា ៖ «បវរកញ្ញាក៏ជាវិស័យមួយមានចំណែកក្នុងការជួយផ្សព្វផ្សាយសិល្បៈ វប្បធម៌ខ្មែរលើឆាកអន្តរជាតិដែរ ពិសេសបង្ហាញពិភពលោកឱ្យបានឃើញពីរូបសម្បតិ្ត ចំណេះដឹង ទេពកោលស្យរបស់នារីខ្មែរ ដែលមានភាពក្លាហានក្នុងការឈរនៅលើឆាកអន្តរជាតិ ហើយបានប្រើប្រាស់នូវសមត្ថភាព ប្រើប្រាស់សំឡេងរបស់គាត់និយាយទៅកាន់ពិភពលោកពីកម្ពុជា។ បេក្ខនារីកម្ពុជា គឺតំណាងឱ្យកម្ពុជាក្នុងការឈរជើងលើឆាកប្រកួតប្រជែងមួយដែលមានការចូលរួមពីប្រទេសជាច្រើនទាំងនៅអាស៊ី អឺរ៉ុប ដើម្បីដណ្តើមយកជ័យលាភីលើកមុខមាត់ដល់ប្រទេសរបស់ខ្លួន។ បេក្ខភាពមួយណាក៏ចង់ទទួលបានជ័យលាភីឱ្យប្រទេសខ្លួនដែរ ពិសេសប្រជាជនរបស់ប្រទេសនីមួយៗ ពិតជាចង់ឃើញបវរកញ្ញាតំណាងប្រទេសខ្លួនទទួលបានជោគជ័យ។
ចុះកម្ពុជាយើង ចង់ឃើញ Miss Cosmo Cambodia របស់យើងទទួលបានជោគជ័យដែរឬទេ? ខ្ញុំឃើញថាបេក្ខភាពប្រទេសនីមួយៗ គេទទួលបានការលើកទឹកចិត្តពីប្រជាជន ឬ Fans របស់គេណាស់ ពិសេសប្រទេសជិតខាងយើង។ សម្រាប់គាត់ជាបេក្ខភាពតំណាងឱ្យប្រទេសកម្ពុជាទៅប្រកួតលើឆាកអន្តរជាតិ គាត់មានសមត្ថភាព មានចំណេះដឹង និង ទេពកោសល្យ ពិសេសគឺមហិច្ឆតា និង ភាពក្លាហាន តែអ្វីដែលគាត់ខ្វះ និង កំពុងត្រូវការបំផុត គឺកម្លាំងចិត្តពីប្រជាជនកម្ពុជាសម្រាប់គាត់ក្នុងការប្រកួតប្រជែងមួយនេះ។ សូមបងប្អូនជួយផ្តល់កម្លាំងចិត្តដល់គាត់ផង ចង់ឃើញគាត់ទទួលបានជោគជ័យ យកជោគជ័យមកវិញទេ? បើចង់ សូមកុំនៅស្ងៀមអី ប្រើប្រាស់សំឡេងគាំទ្ររបស់យើង និង កម្លាំងចិត្តជូនដល់គាត់ទាំងអស់គ្នា។ ពីខ្ញុំ ជូនពរឱ្យប្អូនមានសុខភាពល្អ មានកម្លាំងចិត្តក្នុងការប្រកួត និង ជូនពរឱ្យប្អូនដណ្តើមបានជោគជ័យមកកាន់ប្រទេសកម្ពុជា។ អ្នកជាមនុស្សដែលមានសមត្ថភាព សូមប្រើសមត្ថភាពរបស់អ្នកយកជោគជ័យឱ្យបាន ជោគជ័យសម្រាប់ខ្លួនអ្នក គ្រួសារអ្នក និង សម្រាប់កម្ពុជា»៕
