មិនលែងសើចទេ! ក្មេងស្រីវ័យ ១៧ ឆ្នាំម្នាក់នៅចិន ធ្លាក់ខ្លួនឈឺខូចគ្រឿងក្នុងធ្ងន់ធ្ងរ ក្រោយមានទម្លាប់ចូលដេកយប់ជ្រៅពេក

ក្មេងស្រីវ័យ ១៧ ឆ្នាំម្នាក់នៅឯប្រទេសចិន ត្រូវជំងឺជាច្រើនមុខសម្រុកចូលក្នុងរាងកាយទាំងវ័យក្មេង សឹងតែសង្រ្គោះមិនបាន ដោយសារតែទម្លាប់មិនល្អមួយគត់ គឺចូលដេកយប់ជ្រៅពេក។

តាមរយៈសារព័ត៌មាន បានឱ្យដឹងថា ដំបូងឡើយក្មេងស្រីនេះកើតអាការៈក្អួតមានឈាម លុះក្រោយមកទៅពេទ្យពិនិត្យ ក៏ឃើញថាសួតរបស់នាងមានសុទ្ធតែទឹក រីឯក្រលៀនក៏ខូចបាត់ភ្លាមៗទៀត។ គ្រូពេទ្យបានរកឃើញថា នាងមានជំងឺប្រព័ន្ធភាពស៊ាំប្រឆាំងខ្លួនឯងដល់ទៅ ៣ មុខ គឺរលាកសរសៃឈាម Lupus erythematosus និង Microangiopathy ដែលធ្វើឱ្យប្រព័ន្ធភាពស៊ាំរបស់នាងដំណើរការខុសប្រក្រតី ហើយទៅបំផ្លាញអវយវៈខ្លួនឯង។

គ្រូពេទ្យបានឱ្យដឹងថា ការដេកមិនគ្រប់គ្រាន់ ការចូលដេកយប់ជ្រៅ គឺជាមូលហេតុមួយដែលបណ្តាលឱ្យប្រព័ន្ធភាពស៊ាំចុះខ្សោយ ហើយការសន្សំភាពស្រ្តេស និងការបរិភោគអាហារមិនត្រឹមត្រូវក៏អាចជាកត្តាមួយដែរ។ ដោយឡែក តាមពិតទៅមុននឹងធ្លាក់ខ្លួនឈឺ ក្មេងស្រីរូបនេះមានអាការៈដូចជាឈឺ និងហើមកដៃកជើង ព្រមទាំងកើតផ្តាសាយជាញឹកញាប់ តែនាងមិនបានចាប់អារម្មណ៍ឡើយ រហូតទាល់តែធ្លាក់ខ្លួនឈឺសឹងអស់ជីវិតបែបនេះ៕