មិនមែនអ្នកច្នៃម៉ូដបរទេសទេ តាមពិតឈុតឡូយៗទាំងនេះ ច្នៃឡើងដោយកូនខ្មែរ ហ្វេហ្សិនលំដាប់ខ្ពស់ កំពុងផ្ទុះការចាប់អារម្មណ៍ខ្លាំង

រលកក្រោយនៃហ្វេហ្សិនកម្ពុជា មានធនធានច្នៃម៉ូដហ្វេហ្សិនជាច្រើន បានកំពុងបញ្ចេញឥទ្ធិពលច្នៃប្រឌិតតាមរយៈ​ការរចនាឈុតប្លែកៗ ស្ទីលឡូយ បូករួមនឹងតិចនិច ក៏ដូចជាគុណភាព មិនឱ្យចាញ់ប្រ៊េនអន្តរជាតិឡើយ។ ជាក់ស្តែង ដូចជាប្រ៊េន Puthyvong បង្កើតឡើងដោយកូនខ្មែរ បានកំពុងផ្ទុះការចាប់អារម្មណ៍ខ្លាំង ជាមួយនឹងស្ទីលហ្វេហ្សិនឡូយមិនធម្មតា អ្នកនិយមស្លៀកពាក់ សុទ្ធតែជាតារាល្បី និង អ្នកហ្វេហ្សិនលំដាប់ខ្ពស់។​

ជាការពិតណាស់ ប្រ៊េនសម្លៀកបំពាក់ Puthyvong ត្រូវបានបង្កើតឡើងដោយ លោក វ៉ន​ លីពុទ្ធិវង្ស​ (Puthyvong Vanly) ជាអ្នកច្នៃម៉ូដវ័យក្មេងនៅកម្ពុជា។​ ស្ថាបនិករូបនេះ បានបញ្ចប់ការសិក្សាផ្នែកច្នៃម៉ូដហ្វេហ្សិនពីសាលា Raffles International College ភ្នំពេញ និង បាងកក។

កន្លងមក លោកបានច្នៃឈុតឱ្យតារាល្បីៗ និង ម៉ូឌែលជាច្រើននៅកម្ពុជា។ ជាពិសេស ខូឡិកហ្សិនរបស់លោក ក៏ធ្លាប់បានបង្ហាញនៅលើទស្សនាវដ្តីហ្វេហ្សិនដ៏ល្បីរបស់វៀតណាម MOT ផងដែរ។

ថ្មីៗនេះ លោកបានធ្វើឱ្យផ្ទុះការចាប់អារម្មណ៍បន្ថែមទៀត ដោយបង្ហាញពីការច្នៃឈុតបែបហ្វេហ្សិន សម្រាប់រាជិនីសម្រស់ដូចជា បវរកញ្ញាចក្រវាលកម្ពុជាឆ្នាំ ២០២៤ ប្រាសាទ ដាវីន​ និង សុខគា គីមលាង លំដាប់រងទី ១ នៃ MUC 2025 ជាដើម៕