ជាការពិតណាស់ អ្នកគាំទ្រកម្ពុជារបស់ក្រុមចម្រៀង K-Pop កូរ៉េខាងត្បូង 2NE1 ច្បាស់ជាបានជ្រាបហើយ នៃការមកដល់របស់សមាជិកទាំង ៤ ក្នុងការប្រគំតន្ត្រីក្នុងប្រទេសកម្ពុជានាថ្ងៃទី ៥ ខែកក្កដា ឆ្នាំ ២០២៥ ខាងមុខនេះ។
យ៉ាងណាមិញ មុននឹងការមកដល់របស់កំពូលតារាចម្រៀងកូរ៉េទាំង ៤ រូប «ប្រជាប្រិយ» សូមលើកយកនូវរឿងរ៉ាវឯកជនខ្លះៗរបស់សមាជិកមួយរូប គឺ Sandara Park មកជម្រាបជូនពាក់ព័ន្ធនឹងរឿងរ៉ាវស្នេហារបស់នាង។
អ្នកគាំទ្រចាស់វស្សារបស់ Sandara Park ច្បាស់ជាបានជ្រាបហើយថា Sandara ក៏ធ្លាប់មានម្ចាស់បេះដូងដែរកាលពីជាង ១០ ឆ្នាំ មុន កាលពីនាងរស់នៅឯប្រទេសហ្វីលីពីន។ ក្នុងនោះ ស្នេហ៍ដំបូងរបស់នាង គឺជាតារាប្រុសជនជាតិហ្វីលីពីន លោក Joseph Bitangcol ប៉ុន្តែក្រោយមានទំនាក់ទំនងនឹងគ្នាបានប្រមាណ ១ ឆ្នាំ Sandara និង លោក Joseph Bitangcol ក៏បានបែកគ្នា។
ហេតុផល នៃការបែកបាក់គ្នានោះដែរ មិនមែនមកពីការមិនចុះសម្រុង ឬអ្នកណាមានអ្នកថ្មីនោះឡើយ ពោលគឺអំឡុងឆ្នាំ ២០០៩ ក្រោយទាក់ទងគ្នាបានមួយឆ្នាំ Sandara បានសម្រេចចាកចេញពីប្រទេសហ្វីលីពីន មករស់នៅឯប្រទេសកូរ៉េខាងត្បូងវិញជាមួយនឹងក្រុមគ្រួសារ និង ចាប់យកក្តីស្រមៃក្នុងវិស័យសិល្បៈរបស់ខ្លួន។
គួររំឭកថា Sandara Park និង លោក Joseph Bitangcol បានចាប់ផ្តើមជួបគ្នាដំបូងក្នុងកម្មវិធីប្រកួតមួយរបស់ហ្វីលីពីន «Star Circle Quest» ហើយអ្នកទាំង ២ ចាប់ផ្តើមទាក់ទងគ្នាអំឡុងពេលចាប់ផ្តើមកម្មវិធី «Star Circle Quest» របស់ ABS-CBN។ ដោយឡែក ក្រោយបែកបាក់គ្នាហើយនោះ Sandara Park ក៏បានបន្តចាប់ក្តីស្រមៃយ៉ាងជោគជ័យលើវិស័យ K-Pop រីឯ លោក Joseph Bitangcol ក៏បានរៀបការជាមួយនារីក្រៅសិល្បៈម្នាក់៕
